Shillong, Lber 28 : Lai tylli ki skul Sorkar ha Ri-Bhoi bad East Khasi Hills District, kila ioh ia ki jaka leit shabar ba paka na ka bynta ki khynnah kynthei, kiba la pyntrei lyngba ka project jong ka Indus Tower Limited ryngkat ka jingiatreilang bad ka Northeast Centre for Equity Action on Integrated Development (NEAID).
Ka Indus Tower Limited ka dei ka kompani kaba peit ia ki lad jingiakren bad ka jingphah khubor da ki kor ki bor ka pyrthei mynta. Ia kine ki painkhana la shna da ka jingkyrshan lang jong ka Sorkar India lyngba ka Swachh Bharat Abhiyan.
U Myntri ka Tnad Animal Husbandry & Veterinary Bah A.L.Hek ula plie paidbah ia kawei na kine ki painakha ha Umden, Umroi RMSA Secondary School, ha ka jingiadonlang u MLA ka Umroi Bah Damanbait Lamare bad u Rajender Singh Gurung, Circle CEO-NESA ka India Tower Ltd.
Haba ai jingkren, u Bah Hek ula ong “Kane ka jingpyrshang ka Indus Tower Ltd ka dei ka sienjam kaba kongsan bad ba kotdor bha ha kaban wanrah ia ka koit ka khiah, ka burom bad ka jingbit jingbiang ha baroh ki liang na ka bynta ki khynnah kynthei jong ngi, kiba bunsien ki mad ia kiba bunki jingeh na ka daw ka jingbym don ia ki jaka leit shabar kiba biang ha ki skul jong ki”.
“Nga da iaroh shibun eh ia ka Indus Towers na ki jingpyrshang ba radbah jong ka ban pynjia long bad ruh ban pynshlur ha kaban iatreilang ha kum kine ki kam ha kiwei pat ki thain jong ka jylla Meghalaya” ula bynrap.
Kane ka project ka don ar bynta kiba kongsan tam ha ka jingiaiadei bad ka pule ka dangle khamtam jong ki khynnah kynthei-ka jingtei ia ki jaka pule kiba biang bad ka jingsngewthuh bad jingshemphang ia ka jingdonkam jong ki Khynnah.
Nalor ka jingshna ia ki jaka leit shabar kiba khuid, ka don ruh ka jingai jinghikai ia ki khynnah kynthei ba kumno kin leh khuid ialade khamtam ha ka por ba ki poi jingpoi (jinglong kynthei) da ka jingpynlong ia ki jinghikai, kiba la shna pynbiang bha ba kumno yn pyndih ia ka jingpynrem ne peitpoh da ka imlang sahlang bad ruh ban pynkhlain khamtam ia ki khynnah kynthei da ki jingtip kiba kordor ha ka jingiadei bad ka koit ka khiah jong ki.
U Rajender Singh Gurung ula batai halor ki jingthmu jog ka kompani khamtam ha kaban pynroi ia ki shnong ki thaw. “ Lyngba ki prokram kiba hakhmat duh jong ka Indus Towers kum ka ‘Pragati’, ngi thmu ban pynbha ha ki jingduna kiba iadei bad ki jingtei kiba kongsan bad ruh ban pynkupbor ia ki nongshong shnong baroh”.
“Ym tang ia ki jingtei ia ki skul ne ki jingdonkam hapoh ki skul, kane ka jingpyrshang ka thmu hakhmat eh ban pynkhlain ia ki khynnah pule da kaba pynsngewthuh ia ka jingkordor mar lade, ka jingsngewskhem shimet, bad ruh na ka bynta ka imlang ka sahlang kaba shngain” ula ong.
U Gurung ula ong “Da kaba pynbiang ia ka jaka kaba ngi pule ba kan long kaba khuid bad kaba sngew shngain, ngi iai pyrshang ban pynmih ia ka mynsiem ieit bad burom shwa ialade hapdeng ki khynnah pule bad ha ka juh ka por ruh ban tei ia ki jingtei kiba biang lut nadong shadong khamtam ha ka koit ka khiah hapoh ki ing skul, ba kumta ka jingkyrkhu kan tuid ruh sha ki nongshong shnong baroh hapoh ka shnong ka thaw”.
.){kind=link}