Shillong, Jymmang 08: Ha ka jingiaid shaphrang jong ki jaka ai jingsumar ha ka jylla Meghalaya, 4 tylli ki jaka ai jingsumar kila ioh ia ka ‘Quality Certification’ hapoh jong ka National Quality Assurance Standards (NQAS) na ka Ministry of Health & Family Welfare jong ka Sorkar India.
Kine ki jaka sumar kiba la ioh ia ka jingithuh ki kynthup ia ka AAM Sub Health Centres (SHC) ha Bolchugre bad Waram Songma kiba don ha West Garo Hills, ka Phlangdiloin ha South West Khasi Hills bad ka Umsong ha Ri Bhoi.
Kine ki jaka ai jingsumar kila hap ban iaid lyngba kiba bun ki jingshah khmih bniah ha u Iaiong 2025 bad la shem ba ki lah biang lut ia baroh ki 7 tylli ki kyndon kiba kongsan kiba la buh ban ioh ia ka jingithuh.
Katkum ka National Health Systems Resource Centre, Bolchugre bad Waram Songma kila ioh 92.15% bad 92.73% kaba la pynlong ia ki kum ki Health and Wellness Centres (HWC) kiba nyngkong ha rilum Garo ban iohpdiang ia ka National Certification hapoh jong ka NQAS. Ka Phlangdiloin kala ioh 91.28% katba ka Umsong kala ioh 83.53%.
U Dr. Jacob Marak, District Nodal Officer (Quality), ula iaroh ba ka jingioh ia kane ka Certification ne syrnod kadei ka sienjam ban wanrah ia ka jingkylla ha ka jingai jingshakri ha ka liang ka koit ka khiah.
“Ngi shim ia kane ka khyllipmat ban rakhe ia ka jingktah jong ka NQAS ha kaban rah shajrong ia ka kyrdan ha kylleng ki HWC ki jong ngi. Kane ka jingjop, kadei ka burom kaba leit sha ka kynhun jong ka koit ka khiah kaba pynthikna ban ai ia ka jingsumar kaba paka, ka bym leh shilliang bad kaba don ia ka jingkitkhlieh ia ki paidbah ha ka koit ka khiah” ula ong.
Ki kyndon jong ka NQAS kidei kiba la buh ha ka kyrdan kaba heh na ka bynta ka jingshngain jong ki nongpang, ka rukom ai jingsumar, ki jingtei ki bapher bapher bad ka jingsngewhun jong ki nongpang, kaba pynshlur ban don ia ki tiar ki tar kiba kham bha shuh shuh ban bteng ban ai ia ka jingshakri kaba kham bha shuh shuh.
