Pynksan u CM ia ka jingthung consultant ha Jylla
Shillong, Lber 07 : U Myntri Rangbah ka Jylla Conrad K Sangma ha ka sngi Thohdieng ula iathuh ba ka Jylla kala lah ban ioh palat T. 7,427 klur ki project ha kine ki hynniew snem bala leit noh bad T. 2400 klur la bei ruh da ka Sorkar Pdeng na ka bynta ka Meghalaya Economic Growth Corridor namar ki kam ki stad ki jhad lyngba ka jingthung consultant.
U Conrad ula pyntip ia kane haba jubab ia ka jingkylli bala wanrah da ka Liang Pyrshah ha Iingdorbar Thaw Ain halor ka rai jong ka Sorkar ban thung ia ki consultant bad ka jingdonkam ban hikai ia ki samla ka jylla ba kin trei ia ki kam consultant.
Kat kum ka jingong jong u, haduh 39 ngut ki consultant shimet bad 69 tylli ki kompani consultant la ai kam hapoh ka Jylla mynta.
Haba pynksan ia ka rai, u Conrad ula iathuh ba ha kine ki hynniew snem, ka Sorkar kala lah ban wanrah haduh 13 tylli ki project ba bei tyngka na shabar (Externally Aided Project) hadien ka jingiathong bad ki Ri bapher bapher.
“Namar jong ka kam kine ki stad ki jhad, ngi la ioh ia ka song pisa ba palat T.7,427 klur” ula bynrap.
Kumjuh ruh, u Myntri Rangbah ula pyntip “Ngi la leit bad iakynduh ia ka Myntri pla tyngka bad kala bthah ia ngi ban aiti noh mar mar ia ka Detailed Project Report (DPR) haba iadei bad ka Meghalaya Economic Growth Corridor project hapoh ar kynta. Tang namar ka jingdon ki consultant ba ngi thung, ngi la lah ban pyndep hapoh ka 7 sngi bad ngi la ioh ia ka mang tyngka ba T.2400 klur na ka Ministry of Finance”.
U Conrad ula pyntip ruh ba ka Meghalaya ka dei ka Jylla ba nyngkong ban buh ia ka jingtyrwa ia ka project Utility Mall ba T.132 klur bad pyntip ba ia kane ka mall yn sa pyniaid da ki samla ka Jylla.
U pyntip ba ki kam kila iaid mynta ban pyntbit ia ki sap treikam jong ki samla shynrang bad kynthei ka Jylla ba kin trei ia ki kam consultant.
“Mynshuwa, kumba 2-3% eh ki samla trai Jylla kila trei ha ki kompani consultant. Hynrei, mynta ngi la jan kot ia ka 30% ha kine ki 5-6 snem bala leit noh” ula ong haba kular ba ka Sorkar kan pyrshang kat kaba lah ban pynthikna ba bun ki samla kin nang rung sha kane ka kam.
Nalor kane, u Myntri Rangbah ula ong ba kane kam don jingktah satia ia ka pla tyngka jong ka Jylla naba tang 1% na ka dor jong ka projecr la siew sha ki consultant.
U MLA ka VPP na Nongkrem Ardent M Basaiawmoit haba wanrah ia ka jingkylli bynrap ula kynnoh ba ka Sorkar kala siew da ki lak tyngka ia ki consultant bad siew tang da ki hajar ia ki samla trai Jylla watla ki la trei shitom, ia kaba u Myntri Rangbah ula pynshai ba ka rukom siew jingsiew ka dei kaba shai bha.
“Ka jingkylli ba ngi siew bun ia ki briew ba nabar bad siew duna ia ki samla shynrang bad kynthei jong ngi kam mih satia namar kane kam dei ka rukom treikam jong ngi” ong u Conrad.
Haba u Nongialam ka Liang Pyrshah Mukul Sangma ula kynnoh ba ki consultant kila sei tulop kham bun ban ia ki Ophisar ka Jylla, u Myntri Rangbah ula ong ba ia kane ka kam la leh lyngba ka jingkhot tender bad dei ka kompani kaba siew ia ki consultant ym ka Sorkar.
