Shillong, Naiwieng 26 : Ka Sorkar Jylla kala ai jingmynjur ia ka bynta kaba ar jong ka Meghalaya Logistics and Connectivity Improvement Project (MLCIP) ban shna pynheh ia ki surok bad ki jingtei kiba kongsan ha ka jinglut jingsep ba kot $300 million (kumba T.2,450 klur).
Haba kren sha ki lad pathai khubor hadien ba pyniaid ia ka jingialang jong ka Kynhun Myntri ha ka sngi Balang, u Myntri Rangbah ka Jylla Conrad K Sangma ula ong ba na ka jingmang pisa jong ka project baroh kawei, $240 million kan dei ka ram na ka World Bank ha kaba 90% yn siew da ka Sorkar India bad 10% da ka Sorkar Meghalaya.
Ula ong ba 20% na ka jinglut ha ki project, kumba $60 million kan dei ka synniang na ka Jylla.
“…ki jingiakren bad donkam bad ki jingiapynbeit bad ka World Bank kila sdang bad haba pynshong nongrim ia kane, la shna ia ka DPR bad mynta ka Tnad Planning kala wanrah sha ka Kynhun Myntri ban ai jingmynjur ha kaban pyniaid shakhmat ia kine ki jingiapynbeit bad ka World Bank” ong u Conrad.
“Kane ka dei ka jingiapynbeit bad ngi la ai jingmynjur ban pyniaid shakhmat ia ki project ka World Bank. Ka jingmang pisa baroh ka long T.2450 klur haba phai sha ka pisa baroh bala mang sha ki project surok bad kiwei ki jingtei ba donkam” ula bynrap.
 ban shna pynheh ia ki surok bad ki jingtei kiba kongsan ha ka jinglut jingsep ba kot $300 million (kumba T.2,450 klur).){kind=link}