Shillong, Naiwieng 26 : Ka Kynhun Myntri ka Sorkar Jylla kala ai jingmynjur ban seng ia ka Meghalaya Teacher Training Academy kum ka Autonomous Society, ban nang pynkhlain ia ka jingai jinghikai ia ki nonghikai, ban nang pyntbit ba kin lah shakri bha bad kyntiew ia ka sap jong ki.
Haba kren sha ki lad pathai khubor hadien ba pyniaid ia ka jingialang ha ka sngi Balang, u Myntri Rangbah Conrad K Sangma ula ong ba kane ka Society ba tyrwa, ka ban sa seng hapoh ka Directorate of Education Research and Training (DERT), kan pynleit jingmut ha ka ban ai iaki jinghi kai ba kyrpang sha ki nonghikai ha ki kyrdan bapher bapher.
Ia mynta, bun ki agency ka Sorkar bad ki nongbei tyngka, kila pynlong ia ki prokram ai jinghikai ia ki nonghikai, kiba iapher kawei na kawei pat ha ka jingjop jong ki prokram.
Kane ka academy ba thymmai la khmih lynti ba kan pynbeit ryntih ia kine ki jingpyrshang, ban ai ia kawei ka rynsan ia ka jingai jinghikai kaba paka bha bad ba pynthikna ba ia ka song pisa la pyndonkam ha ka rukom kaba dei.
