Shillong, Risaw 23 : Ka Meghalaya Cricket Association kala pynlong ia ka Apex Council Election hynnin ka sngi saitjain ha Umbir, Ri-Bhoi bad jied biang ia u Bah Gideon Kharkongor kum u Honorary Secretary katba u Naba Bhattacharjee ula wan phai biang kum u President.
Kine baroh arngut kila jop ia ka elekshon khlem ka jingialeh pyrthei. U Bhatacharjee u dei u Honorary Secretary ha ki snem bala leit noh shuwa u 2019 ban shimti u Bah Gideon. Ka dei ha ka jingialam jong kine ba ka Meghalaya kala shah kynthup kum ka dkhot ba pura jong ka BCCI bad sdang ioh iashimbynta ha ki lympung ialehkai cricket hapoh ka Ri.
Ki don sa saw tylli ki kam ha ka Apex Counil ki ban sa thung briew bad kine ki dei ka kam Vice-President, Honorary Joint Secretary, Honorary Treasurer bad Dkhot (Councillor).
U Chiang D Shira ruh ula wan phai kum u Joint Secretary khlem kano kano ka jingialeh, katba u Sengnab Momin ula shah jied kum u dkhot thymmai khlem kano kano ka jingialeh (Councillor).
Tang artylli ki kam kiba don hapdeng ka jingiakhun bad kine ki dei ka kam Vice President bad Treasurer ha kabamar arngut ki kyrtong kila iakhun.
U Bah Rayonald Kharkamno ula jop bad long kum u Vice President bad u Dhubajyoti Thakuria kum u Treasurer.
“Ka elekshon baroh kawei ka long kaba khuid ba suba” ong u Bah W Khyllep, Electoral Officer haba bynrap ba la pynlong ia kane ka elekshon kat kum ki rule bad ki kyndon jong ka BCCI bad ki kyndon jong ka Election Commission ka Ri India (ECI).
Ki Nongmihkhmat na ki 11 tylli ki District ba iasoh bad ka MCA ki dei ki nongthep vote ha kane ka elekshon. Ia la Electoral Roll la pynmih ha ka 10 tarik Risaw bad ia ka jingthep kyrteng la pdiang ha ka 14 tarik ha kaba 11 ngut kila thep.
Ia ka jingbishar kyrteng la leh ha ka 14 tarik Risaw hynrei lain gut kila weng noh ialade ha kane ka juh ka sngi kiba thep ia ka kam Vice President, Treasurer bad Dkhot (Councillor).
Ka jingiathep vote myn ha ka sngi saitjain ka dei kaba la pynlong tang ia ka kam Vice President bad Treasurer.
