Pyllait ka Jylla ia ka ‘Water Smart Kid Campaign’
Shillong, Naiwieng 08 : U Myntri Rangbah ka Jylla Conrad K Sangma hynne ka sngi Balang, ula ong ba ka Jylla Meghalaya ka ioh haduh 63 billion cubic liter ka um ha ka shisnem tang na u slap, kaba dei ka jingioh ba hehbha hynrei, ka Sorkar kala lah pat ban pynlang tang 1 billion cubic liter na kane ka umslap.
“Ka Meghalaya ka dei kawei na ki jaka ba jur bha u slap ha pyrthei. Ngi ioh haduh 63 billion cubic liter ka um manla u snem hynrei na kane, haduh 31 billion cubic liter kala tuid sha Bangladesh bad 31 billion cubic liter kala tuid sha Assam” ula ong haba pyllait ia ka Meghalaya Water Smart Kid Campaign, ka sienjam bala shim lyngba ka Jal Jeevan Mission (JJM) ban pynsngewthuh ia ki khynnah halor ka jingkongsan ban pynlang/tyngkai ia ka um.
Through community participation in the implementation of Jal Jeevan Mission, Meghalaya is already leading the way as a top performer in the scheme nationwide and with the participation of school students, our approach towards sustainable water conservation is further empowered. I… pic.twitter.com/UUDqU8jXmA
— Conrad K Sangma (@SangmaConrad) November 8, 2023
U Myntri Rangbah ula ong ba kum ka sienjam ha ka jingialeh ban tyngkai bad pynlang ia ka um, ka Sorkar Jylla kala shim ia kiba bun ki sienjam, kiba la kyrdan da ki jingbei pisa ba wan nabar (Externally aided project (EAP) bad ka Ministry of Jal Shakti ka Sorkar India.
U pyntip ba haduh 1000 tylli ki top um la shna ha kylleng ki jaka ka Jylla khnang ban lah pynlang ia ka um bad nang pyn bun ia ka um ha ka mei ramew lyngba ki project bapher bapher. “Ngi la pyrshang kat kaba lah ban tyngkai ia ka um namar ka long kaba kongsan ban pynthikna ia ka jingneh bad jingpynim pat ia ki tyllong um” ula ong.
U Conrad u pyntip ba ka tnad Public Health Engineering kala ioh bun bah ka song pisa na ka JJM bad EAP, kaba la jan kot ia ka T.8000 klur. “Ngi don ka jingialeh hakhmat jong ngi bad ki Ophisar kila treikam khlem shongthait ban kynjoh ia ka thong ha kaban pynthikna ba baroh ki Longiing ha Jylla kin ioh ia ka um” ula ong.
Ha kajuh ka por, u Myntri Rangbah u pyntip ba hapoh ka JJM, ka Jylla kala ioh ia ka khusnam kum ka Jylla ba pyntreikam bha (best performer) da ka Ministry ka Jal Shakri nalor ka jingioh ia ki song pisa. U pyntip ba ka Jylla kala pyndep palat 4 lak ki longiing ha ka jingpynioh kor um hapoh Iing bad hapoh u Lber 2024, ka thong ban pyndep ka long 6 lak ki longiing.
Ha kane ka jingialang, u Myntri Rangbah ka Jylla bad u Myntri ka Tnad PHE Marcuise Marak, kila aiti ruh ia ka khusnam Water Guardian halor ka jingpyrshang ban iada bad tyngkai ia ki tyllong um.
Ia kane ka khusnam la ai sha ka shnong Lumshyiap bad ka Water Sanitation Community ka Ri Bhoi District, ka Shnong Darechikgre bad ka Water Sanitation Community ka West Garo Hills District lem bad ka shnong Dura Kantragre bad ka Water Sanitation Community ka West Garo Hills District.
