Nongpoh, Naiwieng 08 : Ka Ri-Bhoi Youth Welfare Organisation (RBYWO) kala dawa ia ka Tnad Soil & Water Conservation ka Jylla ban weng kam mardor ia uwei u Nong Assam, uba la shah thungkam kum u Muster Roll hapoh ka Research & Training Institute kaba don ha Byrnihat.
Ki Nongialam ka RBYWO bala ialam da u Vice President Bah Elvis Kyrsian bad General Secretary Kenny Nongrum, kila buh ia kane ka jingdawa hakhmat u Joint Director ka Tnad Soil & Water Conservation (Research & Training) Bah OT Lyngwa, ha ka jingleit iakynduh kyrpang hynne ka sngi Balang.
Kat kum ka jingong kine ki Nongialam, ka jingdawa ka long ban wengkam noh mardor ia u Jyoti Das uba dei na Nalbari, Assam, ia uba la thungkam dang ha ka 1 tarik Naiwieng lyngba ka jingbthah ne ka hukum jong ki bor ba halor kiba don hapoh ka Sorkar Jylla.
Haba iakren bad ki nongthoh khubor, u Bah Elvis ula ong ba ka RBYWO kam lah ban pdiang ban shu thungkam ia utei u briew na Assam ha katei ka jaka tang da ka jingbthah ki briew ba don ha ka bor.
“Ngi dawa ban weng noh shisyndon ia u namar katei ka kam ka dei kaba lah ban trei da ki trai jylla kiba khlem kam khlem jam” ula ong.
Une u Nongialam ka RBYWO ula pynpaw ia ka jingsngewkhia bad sngewbitar halor ka jingbthah jong u Director ka Tnad, ban thungkam ia u Jyoti Das ha ka jingsiew ba kot T. 14 ne T.15 hajar shibnai.
Ha kajuh ka por, ka Seng kala pyntip ruh sha u Deputy Commissioner ka Ri-Bhoi halor kane ka jingthungkam sopsop haba dawa ba une u khliehduh ka District un tuklar bad leh eiei pyrshah ia kane ka kam beain u Director ka Tnad Soil & Water Conservation.
