Guwahati, Naiwieng 08 : Ki Pulit Special Task Force (STF) ka Assam hynne ka sngi Balang, kila ioh kem ia 4 ngut ki nongkhaii droks bad ioh kurup haduh 36 song u opium ba khia 36 kilo na ka thain Amingaon, Assam.
Kine ki 4 ngut ki nongkhaii droks ki kyrteng u Safiqul Ali(39), Mamtul Ali(31), Raju Ajili(35) bad Ainul Haque(38).
Hadien ka jingioh ia ka khubor syntiat, ka STF kala pynlong ia ka jingkhynra hapoh ka jingialam jong u Additional SP ka Kamrup Kalyan Kumar Pathak. Ka kynhun kala ioh bat ia kawei ka Bolero Pickup ba don u nombor AS01-QC-9956 bad ioh kurup ia une u droks na ka kali.
Kat kum ka jingiathuh ki Pulit, kane ka kali ka dei kaba wan kit ia une u droks na Manipur.
Dang ha u bnai bala lah, ka kynhun STF kala ioh kurup ia u droks ba shongdor T. 5 klur na Karbi Anglong District ka Assam bad ioh kem ruh ia arngut ki briew ha kane ka jingjia.
Ia une u droks la ioh kurup na kawei ka kali kaba dang wan na Dimapur.
