Shillong Nohprah 21: Palat 7 lak ngut ki khynnah skul ka Meghalaya kila ioh jingmyntoi na ka Pradhan Mantri Poshan Shakti Nirman (PM POSHAN).
Ia kane la pyntip da u Director ka Education & Literacy u Swapnil Tembe hadien b aula de plum ia ka jingialang jong ka State Level Steering cum Monitoring Committee jongka PM POSHAN Scheme, kaba pynbiang ia ki jingbam sha ki khynnah skul naduh ka Klas I haduh Klas VIII ha ki skul sorkar bad ki skul kiba ioh jingkyrshan na ka sorkar.
“Kumba 7 lak ngut ki khynnah skul ha ki skul sorkar bad ki skul kiba kyrshan da ka sorkar kila ioh ia ki jingbam hapoh jong katei ka scheme” ong u Tembe ha ba iakren bad ki nongpathai khubor.
Ula pyntip ba ka jingbhah baroh ka kot kumba T.130 Klur ha u snem ba la dep bad kane ka kynthup ia baroh kum ka jingsiew jingiarap ia ki nongshet bad ki nongiarap, ka jinglut jingsep jong ka bam, ka bai kit bad kiwei kiwei.
Hapoh jong kane ka scheme, u Tembe ula ong ba kumba 80 percent ki skul ha ka jylla Meghalaya kila don mynta ia ki ‘School Nutrition Gardens’ bad ka sorkar ka buh thong ba mynta u snem kan kynjoh noh sha ka 100 percent.
“Nga sngewkmen ban pyntip sha phi mynta hadien ka jingtrei shitom kaba bun, ki skul kila don ia ki School Nutrition Garden kaba la kiew na ka 9% sha ka 80% bad mynta u snem ngi don ia ka jingthmu ban pynpoi sha ka 100%,” ula ong.
U Director ula ong, “Ka School Nutrition Garden ka long kum ka kper ia kaba la hikai ia ki khynnah skul ba kin thup ia ki jhur ki jhep bad ia ki soh bad ki sumar sukher ruh ia ki bad haba kila mih ki jhur bad ki soh, ki kheit ia ki bad ki pyndonkam ha ka bam ka jong ki. Sa kawei ka bynta ka long ba ia ki jaboh kiba mih na ka karma shetjia la pyndonkam biang ia ki ha katei ka kper”.
Ula ong ba katkum ka sngi long skul ha u snem, la ai shi sngi ia ki khynnah ba kim donkam ban rah ia kip la ki jongki ba kin ioh ban iashimbynta ha kaban thung ia ki jingthung ha ki kper skul bad la ai jinghikai ruh ia palat 20,000 ngut ki nongshet bad ki nongiarap, ki nongpyniaid ia ki skul, ki nonghikai ha u snem ba la dep da kaba iatreilang bad ka NESFAS ha kaba iadei bad ka rukom bam ia ki jingbam kiba tei.
“Ngi lah pynlong ruh ia ki jingiakob shet jingshet ha kaba ki nongshet bad ki nongiarap kila iashimbynta bad la ai khusnam ia ka jingbam kaba bang tam” ula ong.
U Tembe ula pyntip ba ki jingeh kiba la mad ha ka por ba pyntreikam ia katei ka scheme kadei na ka jingbym ioh ia ki LPG Cylinder bad bun hi kila pyndonkam da ka dieng ha kaban shet ban tiew.
“Kane ka long kaei kaei ka jingeh kaba ngi mad bad mynta u snem ngi kwah ban pynsaphriang ia ka jingdonkam ban pyndonkam ia ka rukom shet kaban ym ktah ia ka mariang namar lada ngi pyndonkam da ki dieng kan mih bun ka tdem bad ka kamara shet ka don marjan bad ka skul, kumta ngim kwah ia katei ba kan jia, ngi kwah ba ka jingshet kadei kaban long kaba iahap bad ka mariang” ula ong.
Ula ong ba ka sorkar ka dang pyrshang katba lah ban pynbiang ia ki jaka shet kiba biang ha ki skul.
Nalor kane, u Tembe ula ong ba ka jingialang kala shim ruh ia ka rai ha kaba iadei bad ka buit treikam ia kaba kin leh naduh u snem ban wan.
“Ngi ngeit skhem ban gin bteng ia kane ka bynta ban kyntiew ia ka rukom ai jingshakri lyngba kane ka Scheme” ula bynrap.
