Shillong, Naitung 02: Ka Traditional Community Healthcare Providers (TCHP) na Meghalaya kala ioh ha ka sien kaba nyngkong eh ia ka jingithuh ne ka Certification jongka Quality Council of India’s (QCI) Voluntary Certification Scheme for Traditional Community Healthcare Providers (VCSTCHP).
Kane ka certification kadei kaba iaid katkum ka kyrdan jongka ISO/IEC 17024:2012 bad la ai ha ka jingialang sam iaki syrnod kaba la long ha Secretariat Wellness Centre ha Shillong ia kaba la pynlong da ka Bio-Resources Development Centre (BRDC) hapoh jong ka Planning, Investment Promotion & Sustainable Development (PIP&SD) Department jong ka Sorkar Meghalaya.
Kine ki nongai dawai tynrai kiba na kylleng ki bynta jong ka jylla kiba kynthup na Khasi, Jaintia, Ri Bhoi bad Garo Hills kidei kiba la pyntbit ialade ha kaban ai jingsumar ia ki jingpang kum ka Jaundice, Arthritis bad ban pynshong bha ia ki shyieng ki shruh. Kane ka syrnod ym tang ba kadei ka jingpynshiha ia ka jingtbit ka jongki hynrei ka plie lad ia ki ban ioh ia ki skhim jongka Ministry of AYUSH ka Sorkar India, kaba ai ia ki kabu kiba thymmai ban pyniar ia ka sawdong sawkun ha ka liang ka koit ka khiah.
“Kane ka sienjam ka long kum ka jingkieng hapdeng ka jingshemphang tynrai bad ka rukom ai jingsumar ka juk ba mynta” ong u Dr. Joram Beda, Commissioner & Secretary ka tnad Health and Family Welfare bad u Director ka AYUSH uba la iashimbynta kum u Kongsan ha ka jingialang.
Ula iaroh ia ka BRDC bad ka North East Christian University (NECU) halor ka jingshimkhia ka jongki ban pyniaid ryntih ia ka jingai jingsumar tynrai bad ula iawer ban kyntiew iaka jingwad bniah bad ia ka rukom pynmih ia ki dawai kynbat tynrai.
U Darlando T. Khathing, Pro Chancellor ka NECU, ula pynpaw ia ka kamram jong ka skulbah kum ka kynhun kaba la shah pynkup bor ban ai syrnod na ka bynta ka thain shatei lammihngi jong ka ri bad ula ong ba ki nongai jingsumar tynrai kiba la ioh ia ka syrnod kin paw kyrteng mynta ha ka QCI portal, kaban plie lad ia ka pyrthei baroh kawei ban tip shaphang ka jingai jingsumar tynrai hapoh ka jylla Meghalaya.
U Gunanka D.B, Additional Secretary ka Sorkar Meghalaya bad u Member Secretary ka BRDC, haba kren maitphang ha ka jingialang ula banjur ia ka jingshimkhia jong ka Centre na ka bynta ban buh ia ki jingthoh ia ki rukom ai jingsumar tynrai, ban pynlong ia ki prokram ban kyntiew iaka jingtbit bad jingshemphang jong ki nongai jingsumar tynrai bad ban seng ia ki Traditional Healing Clinic ha kylleng ki bynta jongka jylla.
“Kane ka jingithuh ka long kum ka mawjam ban pynneh pynsah ia ka jingnang jingtip ha kaba iadei bad ka jingai jingsumar tynrai kaba la don la slem bah ha kaban ai jingshakri ia ka koit ka khiah ha ki thain nongkyndong” ula ong.
Kane ka jingialang kala long ruh kum ka rynsan na ka bynta ki nongai jingsumar tynrai ba kin iasam lang ia ka jingshemphang ka jongki, ban pynkhlain ia ka kolshor bad ia ki jinglong kiba kordor ha ka imlang sahlang. Lyngba kane ka jingai syrnod ne certification, ka Meghalaya kala nang jam ha kaban kyntiew ia ka kam ai jingsumar bad ban pynthikna ba kin bteng ban jam shaphrang ryngkat bad ka jingai jingsumar kaba kum kane ka juk kaba mynta.
 na Meghalaya kala ioh ha ka sien kaba nyngkong eh ia ka jingithuh ne ka Certification jongka Quality Council of India’s (QCI) Voluntary Certification Scheme for Traditional Community Healthcare Providers (VCSTCHP).){kind=link}