Shillong, Iaiong 06: Ka Eastern India Regional Council of the Institute of Chartered Accountants of India (ICAI) kala ai jingithuh ia ka Chartered Accountant na Shillong ka Shruti Pradhan halor ka jingsynniang ka jongka ha kaba iadei bad ka Accountancy.
Kadei kawei na ki 75 ngut ki kynthei kiba la ioh jngithuh na ka ICAI na ka Eastern India halor ka jingnoh synniang halor katei ka liang.
Ka Shruti kala ioh ia ka jingithuh halor ka jingnoh synniang ka jongka ha ka jylla bad khamtam ha kaba kala iaid shakhmat ruh ha kaban ai mynsiem ia ki kynthei ban long kiban ym shaniah ha kiwei ha kaba iadei bad ka jingkamai kajih.
Ka Shruti kala trei shitom naduh u snem 2010 ha kaban ai jingbatai bad ban pynshlur ha kaba iadei bad ka jingkamai kajih khamtam eh ia ki kynthei ba kin ieng ha la ki jong ki kjat.
Ka Shruti kala iathuh ba ha ki 14 snem kiba kala trei hapoh Meghalaya haba ka leit sha ki jaka khap sor bad nongkyndong, ka iohi ba bun ki kynthei ki don bynta ha ki kam kiba rit ban kamai jakpoh.
“Ka lah ban dei ka dukan rit kaba don ha kyndong, ka dukan sha ne dukan die jadoh, ia kaba bun hi kam la pyniaid da ki kynthei” ong ka Shruti bad ka bynrap “Ka jingeh ka long ba bun na ki kim ioh ia ka jingithuh kum kita kiba trei ba ktah”.
Ha kaba iadei bad ka jingiaid lynti kum ka Chartered Accountant, ka Shruti kala ong ba
kala wan sha Shillong ha u snem 2010 kila don tang 8 ngut ki chartered accountant ha ka jylla baroh kawei.
“Ym shim la don ka kynthei ban long ka CA bad bun ki paidbah kim da don jingtip than ia kane ka jingdonkam kaba kongsan ha ka jingim ka jongki. Kala donkam ban ai jinghikai ha kaba iadei bad jngnang jingtip ha kaba iadei bad ka kamai kajih ne ka ioh ka kot na ka bynta ki paid riewlum ka Meghalaya, namar ba kala don ka jingiohnong na ka jinglait ban siew ia ka khajna kala don pat ka jingbym kheiñsnep ha kaba iadei bad ka jingpynlang ia ka pisa bad ka jngbei tyngka” ong ka Shruti.
Kala iathuh ba kala sdang ban iashimbynta ha kaban ai jinghikai ha kaba iadei bad ka financial literacy bad fund management ha ki workshop kiba la pynlong da ki tnad sorkar bad ki kynhun shimet. Nangne kala sdang ban don ia ka jingiadei bad ka jingiajan bad kito kiba seng kam lajong ha ka jylla.
Kala trei kum ki nongaibuit bad bun ngut ki nongseng kam lajong hynrei ka dap da ka jingsngew sarong ban iadonbynta bad ki kynthei kiba seng kam lajong.
