Shillong, Naiwieng 11: Ka Meghalaya kala ioh ia ka nam kum ka ‘Top Performer’ ha ka Business Entry Reform ha ka jingialang jongka Conference of Industries & Commerce Ministers- Udyog Samagam 2025 kaba la long ha New Delhi.
Kane ka jingioh ia ka jingithuh ka pyni ba ka Meghalaya kala lah ban leh bha bad ban shim ia ki sienjam kiba biang bad seisoh ha kaban pynsuk bad pyniaid ryntih ia ki kam ki jam na ka bynta ban sdang ia kino kino ki kam khaii pateng, kaba pyni ruh ia ka jingiengskhem ban kyntiew ia ka jingpynsuk ban leh ia ki kam khaii bad ban kyntiew ia ka jinglong jingman ha sawdong sawkun jong ki karkhana hapoh ka jylla.
Kane ka khusnam ka pdiang ruh ia ka jingshimkhia ka Meghalaya ha kaba iadei ruh bad ka Regulatory Reforms, Digital Governance Integration bad ka jingplie lad ban rejistar ia ki kam khaii pateng, ia kaba kala pynduna bha ia ka jingkhia bad pynbha ia ka jinglong jingman ka khaii pateng hapoh ka jylla.
Ka Meghalaya kala trei shitom ha kaban pyntreikam ia ki jingpynkylla kiba bun hapoh jongka Business Reforms Action Plan (BRAP) kaba la plie lynti ban kiew ka jingkynshew tyngka bad ka jingroi ka ioh ka kot ha kylleng ki thain.
Ka prokram jongka Udyog Samagam, kadei kaba la wan ban iashimbynta da ki nongialam jong ki kompani bad ki karkhana kiba heh bad ki myntri sorkar na kylleng jong ka ri India, kaba long ruh kum ka rynsan ban ithuh ia ka jingseisoh jong ka jylla ha ka jingwanrah ia ki jingkylla ha ka kam khaii pateng.
Kane ka jingioh khusnam ka Meghalaya kum ka ‘Top Performer’ ka pyni shai kdar ia ka jinglong nongialam ha kaba iadei bad ka jingleh kaba thymmai ha kaba iadei bad ka jingpyrkhing bad ka jingplie lad ia ki kam khaii pateng hapoh ki kyndon treikam jongka ri. Kane ka jingjop kadei ka jingpynshisha ia ka jingiohi jngai jong ka jingai jingshakri ia ki paidbah bad ki sienjam kiba iaineh da ka sorkar Meghalaya ban kyntiew ia ka jinglong jingman kaba biang ban leh ia ki kam khaii pateng, kaba long ruh ka jingnoh synniang ia ka thong kaba iar ban kyntiew ia ka ioh ka kot bad ka jingthaw ia ki lad ban aikam aijam ha ka jylla.
