Tura, Nailar 13 : U Nongialam ka Trinamool Congress bad President barim ka Youth Congress Richard Marak uba dei ruh u briew ba iajan bha bad u Myntri Rangbah barim ka Jylla Dr Mukul Sangma, ula ioh jamin na ka Iingshakari halor ka jing shah kem ba kynnoh don bynta ha ka jingkynshoit ban hiarthma ia ka Chief Minister Office (CMO), Tura.
Hadien ka jingshah kem, u Richard ula ud pang ha kaba ki bor khmih kila ialam noh ia u sha Hospital ban ioh sumar bad la pynthiah pang ia u ha Tura Civil Hospital.
Hadien ka jingkem ia u Richard, u Nongialam ka TMC Dr Mukul Sangma ula kynnoh ba kane ka jingkem ka dei tang namar ba ki Pulit ka West Garo Hills kila pynhun ia ki Heh nongsynshar kiba don ha ka bor.
Ka jingkynnoh donkti u Richard kala mih pyrthei hadien ka jingkem ki Pulit ia bun ngut ki nongtrei ka Trinamool Congress kiba don bynta ha ka jingiakawang maw. Uwei na kiba shah kem ula phla ha ki Pulit ba ula sah ha iing u Richard ban lait na ka jingshah kem.
Naduh ka miet 24 tarik Naitung, ki Pulit ka West Garo Hills kila kem haduh 49 ngut ki briew kiba don bynta ha ka jingkulmar ha Tura.
