Shillong, Jymmang 24: Ka State Level Inter School Athletic Meet, kaba la pynlong ha Sports Authority of India (SAI), STC, NEHU, Shillong, kala kut noh hynne ka sngi ha kaba ka East Khasi Hills Distrit kala iohrah ia ka nam lahduh ha kane ka lympung.
Ia kane ka jingiakob ialehkai la pynlong da ka Directorate of Sports and Youth Affairs ka jylla ryngkat ka jingiatreilang bad ka Meghalaya Athletics Association.
Kane ka lympung ka dei kaba la pynlong da ka jingthmu ban lap ia ki nongialehkai kiba tbit na kylleng ki bynta jong ka jylla khnang ba yn lah ban plie lynti ia ki ba kin iakhun ha ki rynsan kiba long hapoh ka ri bad shabar ka ri.
Ka Secretary ka tnad Revenue and Disaster ka Kong Matsiewdor War Nongbri kala long ka Kongsan ha ka jingiadonlang u Bah K. Passah, Assistant Director ka tnad Sports & Youth Affairs,Bah John F. Kharshiing, Working President, Meghalaya State Olympics Association (MSOA), u Col Omkar Singh, Registrar ka NEHU, u Nongialehkai Olympic ka ri Australia u Ian Campbell bad kiwei kiwei.
Ha kane ka lympung ialehkai kaba 3 sngi, kila don 809 ngut ki khynnah kiba la wan ban iashimbynta kiba kynthup 397 ngut ki khynnah shynrang bad 412 ngut ki kynthei ryngkat bad 36 ngut ki nongpyniaid.
Ki khynnah kynthei bad shynrang kila iashimbynta ha ka Under-14, Under-16 bad Under-18.
Haba kren ha ka jingialang, ka Kong Matsiewdor War Nongbri, kala ong ba kane ka dei kawei napdeng ki jingiakob kaba ki nongialehkai ki khmih lynti bad ka tnad Sports nad Youth Affairs kala pynlong ia kane ka jingiakob ban pynshlur ia ki nongialehkai ban don ia ka mynsiem iakhun, ban sei ia ki nongialehkai kiba tbit nalor kiwei kiwei.
Ka East Khasi Hills District kala iohrah ia ka nam kum ka lahduh ha ka State Level Inter-School Athletic Meet 2024 da kaba ioh khur 12 tylli ki Takma Ksiar, 6 tylli ki Takma Rupa bad 3 tylli ki Takma Rnong.
