Nongpoh, Nohprah 01: Kawei ka trok kit skum kaba don ïa u number AS 01 DC 8158 ka la ingkhong khait hadien ka jingkem ding kynsan u skum. Kane ka jingjia ka la jia hynne ka step phyrngap hajrong ka jingkieng flyover ha Jorabat.
Katkum ka jingtip ba la ïohlum la on, ba kane ka jingjia ka la jia ha ka por ba kane ka kali kit skum ka dang wan na ki bynta jong ka Sonapur ban leit pynhap pat sha 11 Mer, Jorabat, hynrei khlem lah ban tip na kaei pat ka daw ba kane ka trok ka la kem ding kynsan kynsan.
U nongniah jong kane ka trok u la pharep ba don katto katne ki briew kiba la shong ha kawei ka night super bus kiba la donkti ban leh ia kane ka kam.
Haba ïoh jingtip halor kane ka jingjia, ki pulit ka Jorabat Police Outpost ha ryngkat ki kali pynlip ding na Dispur ki la poi marmar sha kane ka jaka ban pynlip ïa ka ding kaba la klang bha bad kaba la pynshongsyier ïa ki paidbah ba shong basah ha kane ka thain bad hadien katto katne por la lah pat ban tem noh ia katei ka ding kaba la klang bha.
La ioh jingtip ruh, ba watla ia ka daw ba tikna halor ka jingkem ding jong katei ka trok ym shem la lah ban tip satia hynrei na ka liang ki bor pulit ki dang pynlong ia ka jingtohkit ban lap ia ka jingshisha.
