Shillong Kyllalyngkot 09: Ka NorthEast United FC kan iakhun pyrshah ia ka Punjab FC ha ka Indian Super League (ISL) 2024-25 ha ka sngi Thohdieng ha Indira Gandhi Athletic Stadium ha ka por 7:30 mynmiet.
Ka NEUFC kala jop dang shen da 2-1 ia ka Punjab bad kumta ka don ia ka kabu ban jop arsien ia kiba iakhun pyrshah ia ka ha ka sien kaba nyngkong kumba kala pynrem teng ha u 2020-21 ia ka Mumbai City FC bad East Bengal FC. Ia ka Punjab FC, kane ka jingiakhun ka long kaba kongsan ban lait na ka jingshah rem kaba 5 sien lynter ha kaba kam shym la lah ban ialehkai bha mynta ka samoi.
Ka North East United FC ka don ha ka kyrdan kaba 6 bad kala kamai 22 point na ki 14 sien ki jingiakhun ha kaba kala re mar sien bad jop arsien ha ki 5 sien ki jingkhun kiba la dep.
Ka Punjab FC ka don ha ka kyrdan kaba 8 bad kala kamai 18 point na ki 13 sien ki jingiakhun ha kaba kala jop 6 sien bad mad ia ka jingrem 7 sien.
Ka North East United FC kadei ka kynhun ialehkai kaba la ioh ban thep bun kol eh ha kane ka League, da kaba ioh thep 29 kol katba u Alaaeddine Ajaraie ula ioh thep mar wei haduh 14 kol. Ka Punjab FC kala wan ba 7 ha kane ka bynta da kaba ioh thep 20 kol ha kaba u Luka Majcen ula thep 5 kol bad u Ezequiel Vidal ula thep 4 kol. Ka Punjab FC kan khmih lynti ba kan lah ban ialehkai bha na ka jingwanphai biang jong kine ki arngut ki rangialehkai ki jongka namar kim shym la ioh ban iakhun pyrshah Kerala Blasters FC halor ka nongrim ba kila shah suspon.
Ka NEUFC kala lah ban jop bad kam shym la ailad ia kiba iakhun pyrshah ia ka ban ioh thep kol ha ki ar tylli ki jingiakhun kiba la dep bad kane kadei ruh kaba la urlong teng ha u snem 2018-19. Ka jingjop 3 sien kynthih bad ka jingbym ailad ia ka kynhun kaba ialehkai pyrshah ban ioh thep kol kan long ka sien kaba nyngkong syndon ha ka histori jong ka ISL.
Ka Punjab FC kam shym la lah ban thep kol ha ka jingiakhun kaba khatduh ka jongka hynrei kala ioh thep kol ha ki 3 tylli ki jingiakhun kiba la dep.
Ka NorthEast United FC kala lah ruh ban ialehkai bha da kaba shut na jngai ia ka bol ban ai ha ki para nongialehkai ki jongka bad kane ka rukom ai bol najngai ka long 78 sien ha kawei ka jingiakhun. Hynrei ka jingbeit pat ban pynpoi ia ka bol hala u nongialehkai ka long tang 44.6% bad kadei ka kynhun kaba wan ba phra ha kane ka bynta.
Ka Punjab FC kala jop shisien na ki 5 tylli ki jingiakhun ha kaba Luka Majcen ula ioh thep ia ka kol ha ka ISL. Hynrei dang shen u Majcen ym shim la ioh thep kol ha ki 3 sien jong ka jingiakhun bad ym shim la ialehkai ha ka jingiakhun kaba khatduh kaba la pynlong ia ka Punjab ban mad ia ka nam rem. Kumta ka long kaba kongsan bha ia ka jingwanphai u Majcen na ka bynta ka Punjab.
Ki nongialehkai kiba la pynmih bujli ne Substitute ka Punjab FC kila ialehkai bha ha kaba kila ioh ban thep kol ban pynjop ia ka kynhun. Kumta kin khmih lynti ba kan don kum katei ka juh ka jingkylla ha ka jingiakhun pyrshah ia ka NEUFC. Kumta ka NEUFC kan hap long kaba husiar bha haba mih bujli ki nongialehkai ka Punjab bad kam dei ban ailad ia ki ban ioh thep kol. Kumba ka long ka Punjab FC kala ioh thep 6 kol lyngba ki nongalehkai kiba la pynmih bujli.
Ka NorthEast United FC bad ka Punjab FC kila dep ban iakynduh 3 sien ha kaba kila ia jop mar shisien bad iakhiad shisien.
 2024-25 ha ka sngi Thohdieng ha Indira Gandhi Athletic Stadium ha ka por 7:30 mynmiet.){kind=link}