Shillong, Nailar 05 : Namar ka jingkhie biang ki kam umsnam ha Bangladesh kaba lam sha ka jingiap sa kumba 98 ngut ki briew tang hynnin ka sngi U Blei, ka Myntri Rangbah Duh ka Bangladesh, Sheikh Hasina, kala iehnohkam hynne ka sngi Nyngkong bad kala phet krad syndon napoh ka Ri, kaba pynkut ia ka jingsynshar jong ka, kaba la neh 15 snem.
Naduh ba khie ka jingiakhih pyrshah ia ka jingbhah kam hapoh ka Ri ha u Naitung, haduh 300 ngut ki briew kila iap na ka jingiatakhuh bad pynibor pyrshah ia ki bor pahara lem bad ki kynhun kiba kyrshan ia ka Sorkar.
Ka Sheikh Hasina kala phet krad napoh ka Ri bad kala wan poi sha India da ka helicopter ki shipai. Haba sot na ka CNN-News 19, ka Sheik Hasina kala wan poi ha Agartala, Tripura.
Da ki hajar ngut ki nongiakhih kila leit gherao ia ka iingsah jong ka ha Ganabhadan, Dhala hynne ka janmiet sngi Nyngkong hadien ba ka Hasina bad ka para ka Sheikh Rehana, kila dep mih ban phet sha ki jaka kiba shngain.
Ha kajuh ka por, u Army Chief General ka Bangladesh Waker-Uz-Zaman, ula pyntip ba ki shikai kin sa thaw ia ka Sorkar ba shipor ban pyniaid ia ka synshar khadar hapoh ka Ri.
Hynne ka sngi u Zaman ula iakynduh ruh ia ki nongialam jong ki seng sain pyrthei bapher bapher kynthup ka Liang Synshar Awami League lem bad ka Liang Pyrshah BNP lem bad kiwei kiwei ki kynhun.
Kane ka jingiakhih kala sdang da kaba jai jai ha ki taiew ba khatduh jong u Jylliew halor ka jingdawa jong ki samla pule ba kwah pynkut ia ka jingbuh bhah ha ka thungkam Sorkar hynrei suki suki kala kylla poi sha ka jingiaumsnam hapdeng ki nongiakhih bad ki Pulit lem bad ki kynhun ba kyrshan ia ka Sorkar ha Dhaka University.
Ka Sorkar ka pyrshang ban tehlakam ia ka jingiakhih da ka bor, ki korphiw bad jingkhang internet hynrei kine kila kyrtoh kylla, kaba la nang ai ding shuh shuh haduh ba poi ka jingiap ki 300 ngut ki briew.
Namar kane, ka jingdawa kala mih ba dei ban pynkut noh ia ka jingsynshar jong ka Sheik Hasina ba 15 snem ha ka Ri.
