Nongpoh, Nailar 05 : Ka Ri-Bhoi District kala sakhi ia ka jingshlei um kaba jubor bha ha kiba bun ki jaka jong ka District ha ka janmiet sngi Nyngkong, hadien ka jingther u slap uba neh da bun bun kynta.
Baroh ki jaka them bad jaka madan jong ka District kila shah tap lut ha ka umsaw kaba lang na ka umslap bad la shem ha jan baroh ki jaka, ka daw ka jingshlei um ka dei hi namar ka jingbym biang jong ki nala ban tuid ka um.
Kat kum ka khubor ba ioh lum, ki shnong kiba shah ktah jur bha ha kane ka jingshlei um ki dei ka Mawsmai 11 mer, Baridua bad ka Jorabat.
Kine ki jaka kila sakhi ia ka umsaw kaba la tap ia palat 2 phut ia ki jaka them kynthup ki surok haduh ba ki kali kim lah shuh ban iaid lyngba namar ka jingrung ka um shapoh ka kali.
Ka jingdheng kali kaba jur kala jia ha ka thain Baridua kaba la neh da ki kynta haduh wat ki kali kit nongpang ruh kila hap ban ieng hajuh.
