Shillong, Nailar 25: U Myntri Rangbah barim ka jylla, u Salseng C. Marak, u la long u “Brand Ambassador” na ka bynta ka jylla bad wat ha ka khyllipmat ba khatduh ha ka jingim ka jong u ruh ym shim la klet ban leh ia ka kam kaba bha na ka bynta ka jylla Meghalaya.
Ia u Salseng Marak, ia uba la tip ruh kum u “Mr. Clean” namar ka jingkhuid ha ka kam sain hima sima, ha ka por ba ula shitom ula rai ban leit phah sumar ha Tura Civil hospital, watla u lah ban leit phah sumar ha kano kano ka hosipiatl kaba la pyniaid da ki riewshimet kaba don ha ka jylla, ka ri ne wat shabar ri ruh kumjuh hynrei ula leit sumar ialade ha ka hospital sorkar.
Kane ka jingleh ka jong u kala nang ai jingshaniah ia ki jaka sumar ka sorkar jylla, bad kane kan iarap shibun ha kaban ai ia ki paidbah iaka jingshaniah ban leit phah sumar ha ki hospital sorkar bad ha kajuh ka por kala ai mynsiem ruh ia ki nongtrei ka koit ka khiah da katei ka jingleh u SC Marak.
Kane ka jingleh jong u SC Marak, kala pynlong ruh iaka Myntri ka Koit ka Khiah ka Dr Ampareen Lyngdoh ban kren haba iashimbynta haka jingai sngewlem ïa u Myntri Rangbah barim, ha kaba kala ong, ba ka jingshah sumar jongu ha Tura Civil Hospital ka lum kum ka jingai certificate ba ki jaka sumar ba la pynïaid da ka sorkar ki donkam ne dawa.
“Kaei kaba ngi sngewtynnad eh shaphang u Marak, ka long ba la sumar ia u ha Civil Hospital ha Tura…ka jinglong sngewrit une u briew. Naduh ki sngi jong ka jingim jong u haduh ka khyllipmat ba khatduh ba ula ring mynsiem, ym ju duh jingshaniah ha ki rukom pyniaid ka sorkar”, la ong ka Dr Ampareen Lyngdoh hapoh ka iingdorbar.
U SC Marak hapoh hospital ym shim la dawa eiei bad ula kohnguh ia baroh ki jingbthah jong ki nongtrei ka koit ka khiah. Da kaba kren lyngkot, ym shim la leh kum uta Myntri Rangbah barim, hynrei ula long kum kiwei pat ki nongpang paidbah. “Shisha kane ka dei ka jait jingpynskhem kaba ki jaka treikam sorkar ki donkam,” la ong ka Myntri ka Koit ka Khiah shaphang une u nongïalam uba sngewrit jong ka jylla.
Lada u SC Marak u kwah ban ai nuksa ia kiwei pat ban bud, katei ka jingthrang ka jongu kala urlong, namar tang hadien ka jingkhlad noh ka jongu ka lah ban don ka jingktah ia u Myntri Rangbah ka jylla uConrad K Sangma uba la leit ban phah sumar ialade ha ka janmiet jong ka Sngi Thohdieng.
U Sangma ula sah miet bad la sumar ia u namar ka jingioh ia ka jingpang Scrub Typhus bad Typhoid bad la ai iaka jingsumar kaba bha tam da ka hospital sorkar. Hynrei haka sngi Saitjain, la pyllait noh ia u Myntri Rangbah ban leit phai noh sha la iing hynrei u don pat ha ka jingpeit bniah jong ki nongai jingsumar.
Kine ki jingleh jong u SC Marak bad mynta u Conrad K Sangma kin iarap shibun ban pynrung ia ka jingshaniah ha ki paidbah, hynrei ka jingai jingshakri jong ki jaka sumar ba pyniaid hi da ka sorkar jylla ki donkam kyrkieh ban pynbha bad pynjanai bha naduh ki jingtei, ki tiar, haduh ka jingdon ki dawai ki dashin bad ki Specialist, namar katto katne ki jaka sumar ba la pyniaid da ka sorkar jylla ki long kiba duna haduh katta katta bad kim lah ban ai ia ka jingsumar kaba pura.
Ka jylla ka dang ioh iala ka jong ka Medical College, watla ki kam ki jam ki dang iaid shakhmat bad ban khring ruh ia ki doctor kiba stad bad shemphang sha ka jaka ai jingsumar ka sorkar jylla.
Peit lang ia kane
