Jowai, Nailar 25 : Ki riewieid phutbol ka Ri-lum Jaintia, ki bym lah ban wan sha Shillong ne ki bym ioh ticket, ki lah ban peit mynta ia ka Live Streaming jong ka jingiakhun semi phainal ka Durand Cup 2024 hapdeng ka Shillong Lajong pyrshah ia ka North East United FC ha Jowai bad Khliehriat.
Ka Directorate of Sports & Youth Affairs ka Sorkar Jylla ryngkat ka Ophis Deputy Commissioner, kila pyntip ba kin buh ia ka Fan Park (jaka peitkai phutbol ki paid ieid phutbol) kawei ha Jowai bad kawei ha Khliehriat lashai ka 26 tarik Nailar (sngi Nyngkong).
Ka Fan Park ha Jowai kan don ha madan Daimasi Ladthalaboh, Jowai bad ha Khliehriat pat kan don ha phyllaw ka Ophis u Deputy Commissioner.
Ka Tnad Sports kala iatreilang bad ka Ophis u Deputy Commissioner lem bad ki Dorbar Shnong ban lah pynbeit ia kine ki Fan Park.
La kyntu ia ki paidbah ba kin wan iapeit bad ban kyrshan iala ka jong ka kynhun ha kane ka jingialehkai ka ban sdang naduh ka por 5:30 baje janmiet.
Ka Tnad kala buh haduh 6 tylli ki Fan Park ha Shillong bad kine ki kynthup ia kawei ha Mawlai Madan Heh (Stadium), ha RV Lyngdoh Parking Lot (pyrshah ka Golf Retreat), ha Madan Malki, ha Umpling Maw-arling, ha Laitumkhrah Police Point Parking Lot bad ha NEHU Campus.
Peit lang kane
