Guwahati, Nailur 12 : U General Secretary ka Assam Pradesh Congress Committee, u Kamrul Islam Choudhury ula iehnoh na kane ka kam kaba u bat hapoh ka party hynnin ka sngi U Blei.
Ha ka shithi kaba ula thoh sha ka President ka Congress, ka Sonia Gandhi, u Choudhury ula pynpaw halor ka jingbym shai bad ka jingbym don ia ka nongrim kaba skhem hapdeng ki nongialam ka APCC kum ka daw kaba kongsan halor kane ka jingiehnoh kam ka jong u.
Nalor kata ula ong ruh ba ka state unit jong ka Congress ha Assam kam don kano kano ka plan na ka bynta ka lawei bad ba kala shu neh tang ka nam.Ula ong ruh ba um shym la iohi satia ia kino kino ki sienjam ba lashim da ka state unit ban pynkhlain ia ki jingtreikam jong ka seng Congress ha ka jylla.
U Choudhury ula bynrap ruh ba ma u ha ryngkat ki nongtrei jong ka party kila trei borbah na ka bynta ban kyntiew ia ka party ha ka jylla, hynrei ki sngew bynniaw jur hadien ba kam shym la don kano kano ka jingpynshitom pyrshah ia ki MLA ka Congress kiba la ai jingkyrshan markhongpong (cross-voted) ha ka ilekshon jied president kaba dang shen, kata watla ki nongialam ba halor kila pdiang ia kane hakhmat u paidbah.
Ha kajuh ka por ula kdew ruh ba wat u president ka Congress ha Assam u Bhupen Bora ula tip bha ha kaba iadei bad kane ka mat ‘cross-voting jong kine ki MLA, da kaba khot ruh ia ki ki nongshet kylla.
Shuh shuh ula ong ba da ki hajar ngut ki nongtrei jong ka party kumba long ma u kila trei borbah na ka bynta ban kyntiew ia ka party, hynrei na ka liang ki nongialam ki don ha ka jingartatien bad ki iohi ia kane ka jingtrei ka jong ki kiba la shu kylla long lehnoei ha baroh kine ki snem kiba la leit noh.
Ha Karimganj District, u Choudhury ula pynpaw ruh lyngba ka twitter halor kane ka jingiehnoh kam ka jong u da kaba thep ruh ia ka Congress Assam Unit bad ka National Unit.Kham hashwa u Choudhury u dei ruh u National Secretary jong ka National Student Union of India (NSUI), Congress’ student wing, bad u president jong ka Assam Pradesh Youth Congress (APYC).
