Shillong, Nailar 22 : U Nongialam ka Liang Pyrshah Bah Ronnie V Lyngdoh ha ka sngi Palei ula ong ba ula ieh ha ka jing stad jong u Lamphang ka Iingdorbar Thaw Ain la un weng noh ne kumno ia u na ka shuki Nongialam ka Liang Pyrshah.
U Bah Ronnie ula sah marwei kum u MLA ka Congress ha ka Iingdorbar Thaw Ain ka Jylla hadien ka jingleit iasoh ki lai ngut ki MLA sha ka National People’s Party (NPP).
Haba kylli ia kaei kaban jia ia u, une u MLA ka Mylliem ula ong “Ka shong ha u Lamphang namar nga la sah marwei mynta”.
“Ngan sa iakynduh ia u Lamphang lashai ka sngi bad nga lah ban hiar shuki noh lane u lah ban shu pynbna bala weng ne da kano kano ka lynti” ula bynrap.
Ka Dorbar synrai jong ka Iingdorbar Thaw ka Jylla kan sdang naduh ka 23 tarik Nailar haduh ka 30 tarik Nailar.
Ha kajuh ka por, une u Nongialam ka Congress ula thalain tyngeh ia ka Voice of the People Party (VPP) halor ka jingpyrshang ban shim ia ka bynta ban ak kum u Lamphang.
“Ka dei ka jingkren biej. Ki (VPP) kila shim ia ka bynta jong u Lamphang. Nga tharai ka shong ha u Lamphang la un ithuh ia nga kumu dkhot ka Liang Pyrshah ne em. Lada ngam dei u dkhot ka Liang Pyrshah, nga dei u dkhot jong kano pat ka kynhun. Ngam don satia ha ka Liang Synshar lane ha ka Liang Pyrshah-kumta ka mut ba kila shimti hi ia ka kam jong u Lamphang. Kila shimti ia ka bynta jong ka Tenth Schedule lehse ki kwah ban mait noh ia ka jinglong MLA jong nga, kane hi ka pyni ia ka jingsngew baheh bad lehse kim don kam satia da kiwei kiwei lait noh tang ban kren pyrshah ia ngi namar ki padibah kin sa vote biang ia ngi ha ki District Council bad ki paidbah kin sa vote biang ia ki ha State Assembly” ula ong.
Haba kylli la ka Congress ka kloi ban iatreilang bad ka TMC, u Bah Ronnie ula ong ba ka party ka ieh ha ka high command halor kane ka kam.
“Lada poi sha kane ka bynta, ngin ieh ia ka rai ha ka State Party bad ha ka kyrdan ka AICC. Lad aka AICC ka ong ba phi iatreilang bad ka TMC, ngin sa iatreilang bad lad aka AICC kam ai satia ia kano kano ka jingbthah, kan nym don satia ia ka jingiatreilang ha Assembly” ula bynrao.
Halor kawei pat ka jingkylli, une u Nongialam ka Liang Pyrshah ula pyntip ba ka NPP kaba don ha ka Liang Synshar, kala phah iakren ia u lyngba ki para MLA jong u hi.
