Ym don jingshisha ka iasoh BJP-UDP, tang ki reel
Shillong,Nailur 16 : U National President ka NPP bad Myntri Rangbah ka Jylla Conrad K Sangma ha ka sngi Ba-ar ula pynpaw ba ka NPP ka long kaba iatylli bad baroh 33 ngut ki MLA ki dang skhem kawei bad baroh ki dang trei shitom ban jop ia ka Shillong LS By-election bad ka elekshon GHADC.
“Ka NPP ka long kaba ia tylli pura. U Symbud Myntri Rangbah ula kren na ka bynta ka NPP ha kato ka sngi bad ula ai ia ka dur kaba shai ba ngi dang iatreilang kawei. Ngi don ia 33 ngut ki MLA, ngi dang iatylli pura bad iatrei shitom, ym tang na ka bynta kane ka Sorkar, hynrei ban pynthikna ba ka party ka nang heh nang san ha ki sngi ban wan” ula ong.
U Conrad ula kdat sharud ia ki jingmih khubor antad ban don ka jingiasoh hapdeng ka BJP-UDP ha ki social media.
“Ngam pat iohsngew ia kata na kano kano ka tyllong ba lah ban shaniah. Nga dang shu iohi tang ha ki reel bad ki khubor social media” ong u Conrad.
Haba kyntait ban kynthoh eiei, ula ong “Ngam lah ban kynthoh da kaba pynshong nongrim na ki reel bad ki khubor. Dei ban pynshong nongrim ha ka jingshisha. Tad haduh ba ngan da iohi ia kaei kaei kaba thikna, ngan kiar ban kynthoh eiei mynta”.
