Shillong, Nailur 16 : Ka Sorkar Jylla ka khmih lynti ban pynmih khajna bynrap sa T.150 klur hadien ka jingpynkylla ia ka rukom treikam hapoh ka tnad Excise, ong u Myntri Rangbah Conrad K Sangma ha ka sngi Ba-ar.
Hadien ba dep pyniaid ia ka jingialang ka Kynhun Myntri, u Conrad ula iathuh ba ka Kynhun Myntri kala mynjur ia ka jingbuh kyrdan ia ki kyiad IMFL bad pynkylla ia ka Meghalaya Excise Rules bad Bonded Warehouse Rules, 2026.
U iathuh ba artylli ki rai ba kongsan la shim ha ka jingialang.
“kaba nyngkong ka long ka jingklop lang ia ka excise duty bad ka VAT ha kawei ka khajna. Mynshuwa, ia ka Vat la khmih da ka Tnad Taxation. Mynta, la klop lang bad ka excise duty bad yn sa lum noh kum kawei ka khajna da ka tnad Excise” ong u Conrad.
Haba ai nuksa, ula ong “Lada T.100 la lum kum ka excise duty bad T.100 kum ka VAT, mynta kan long noh T.200 kum ka ad valorem. Kane kan pynthikna ba tang kawei ka tnad kan khmih ia ka jing lum khajna excise bad pynbeit ryntih ia ka jinglum”.
Halor ka rai kaba rai, u Conrad u ong ba ka Sorkar kala pynkiew ia ka dor ban pynduna ia ka jingiapher ka dor jong ka kyiad bad ki Jylla ba marjan.
“Ka Assam bad Arunachal Pradesh kila pynkiew dang shen ia ka excise duty ia ki mar bapher bapher, kaba la wanrah ia ka jingiapher ha ka dor ha Meghalaya bad khamtam ha Assam. Ngi la rai ban pynkiew ia ka dor jong ngi ban pynduna ia kane ka jingiapher” ula ong haba bynrap ba kane ka jingpynkiew lah khmih lynti ba kan pynioh khajna bynrap sa T.150 klur ia ka Jylla.
