Shillong, Nailur 25: U Myntri ka tnat Social Welfare bah Paul Lyngdoh hynne ka sngi Nyngkong, ula pyntip baka sorkar Jylla ka thmu ban ai jingmyntoi haduh 1 lak ngut ki khynnah lyngba ka Meghalaya Early Childhood Development Mission (MECDM).
U Bah Paul ula pyntip ia ane hadien ka jingialang hapdeng ka tnat Social Welfare bad ka tnat Pule Puthi haka jingdon lang u Myntri ka tnat pule Rakkam A Sangma, u Nongaibuit ka tnad Pule Puthi bah H.M Shangpliang lem bad ki heh ophisar jong kine artylli ki tnat treikam sorkar.
Haba kren sha ki lad pathai khubor u bah Paul ula iathuh ba ka thong jong kane ka jingialang ka dei ban wad ia ki lad lynti kumno ban pyntyllun shakhmat iaka MECDM naka bynta ka jingmyntoi ki khynnah haka jingiatreilang bad ka tnat pule puthi.
U bah Paul ula iathuh ba haka jingialang, u Principal Secretary ka tnat Social Welfare lyngba ka kor ai jingbatai (Presentation) ula pynsngewthuh kumno ban pyniaid shakhmat bad kumno ban pynbeit iaki kynrum kynram haba iadei bad ki jyrwit jyrwat kiba long kum ki maw jynthut lada pyntyllun noh iaka MECDM.
“Haka jingialang la rai ban don daka Draft ka ban long ka kyndon lane ka lynti ban bthah ia kine ki artylli ki tnat kumno ba kin iatreilang ha kaban pyntyllun iaka MECDM naka bynta ka jingmyntoi ki khynnah jong ka jylla” ong u bah Paul.
U bah Paul ula kubur ruh ba ki jingeh haba iadei bad ka jingpyntreikam iaka MECDM kadei ruh namar haduh 1500 tylli ki shnong kim pat don iaki Anganwadi Centre bad ha kane ka jingiathir bad ka tnat Pule Puthi la shim rai ban pyndonkam shwa daki kamra jong ki School kiba thyli ha ki shnong ki bym pat don iaki Aganwadi Centre.
Ula iathuh ba hapoh 1 snem, ka tnat Social Welfare kan sa leh ban thaw thymmai haduh 600 tylli ki Aganwadi Centre bad naka liang ka tnat ka don ruh ka thong ban ai jinghikai iaki khynnah hapoh kine ki Centre ban pynkhreh iaki khynnah.
“Ngi la bthah ia baroh 2 tylli ki tnat ban wanrah daka thong lane ka Roadmap kumno ban pyniaid shakhmat ban pyntreikam iaka MECDM bad hadien kane ka tnat kan thoh sha u Myntri Rangbah ka jylla haba iadei bad ka jingdonkam pisa ban pyntreikam noh iaka MECDM” ula ong.
