Iatreilang ka Sorkar bad ka BAKDIL ban kyntiew ia ka roi ka par ki Khynnah ha Ri-lum Garo

Shillong, Jymmang 07 : Ka Sorkar Meghalaya ka la pynbna ïa ka jingïatreilang bad ka BAKDIL, kaba dei ka tnat shakri paidbah jong ka Catholic Diocese ha Tura, ban kyntiew ïa ka roi ka par jong ki khynnah rit (Early Childhood Development) ha ki san district jong ka Garo Hills.

Ha kane ka jingpyniasoh ba la pynlong ha St. Luke’s Church, Tura lah don ryngkat u Myntri Rangbah ka Jylla Conrad K. Sangma.

Kane ka jingïatreilang ka dei kaba la pynshong nongrim halor ka jingkyrshan jong ki nongïalam niam kum ki Parish Priest, Catechist, Pocharok bad ki Touring Sisters, ban wanrah ïa ka jingïatrei lang bad ka Meghalaya Early Childhood Development Mission (MECDM).

La mang ruh ban ai jinghikai ha ka liang ka jingnang jingtip, ka jingkoit jingkhiah ki kmie bad ka jingïarap ha ka jinglong khynnah lyngba ki jingïalang niam bad ka imlang sahlang.

Ia ka Memorandum of Understanding (MoU) la soi da u Dr Sampath Kumar, IAS, Principal Secretary & Development Commissioner, uba dei ruh u Chief Executive Officer jong ka MECDM ryngkat bad u Rt. Rev. Andrew R. Marak, Bishop jong ka Tura Diocese. Ki sakhi ha kane ka jingïasoi ki long u Bah Ronald Kynta, COO jong ka MECDM bad U Fr. Cyril Sangma, Director jong ka BAKDIL.

La wan shim bynta da kumba 100 ngut ha kane ka jingïalang, kynthup ki nongkit kam ka sorkar, ki tnat Social Welfare, bad ki nongïalam SHG ba la peit da ka BAKDIL. Ha kane ka jingialang la don ruh ki jingpynshai paidbah bad kumjuh ruh ki jingrwai bad jingshad tynrai kiba la pynkhreh kyrpang.

Ha ka jingkren, u Myntri Rangbah u la batai ba ka jingkyrshan ïa ki khynnah rit ka dei ka bynta jong ka thong ban kyntiew ïa ka roi ka par ha ka jingim baroh kawei. U la kdew ïa ka jingïarap ba la ioh lyngba ka MOTHER dashboard ban peit bniah ïa ka koit ka khiah jong ki longkmie bad ki khun. “Ka jingarap ba lah ai ha ki khynnah ka long kaba kordor haduh katta katta kaba lah ban pynwan bad pynshna dur kaba bha tam ia ka lawei jong ki” u lah pynpaw.

U Fr. Cyril Sangma u la pynpaw ïa ka jingïaroh jong kane ka jingïatreilang, ki lah ia leit jurip ruh ia ki shnong kiba don ha ka district. U lah kyntu ruh ïa ki nongïalam niam ba kin shim bynta ha kane ka jingtrei. U Bishop Andrew R. Marak ruh u la ong, “Ka long kaba donkam ba ngin trei lang na bynta ka bha ka miat jong ki paidbah.”

U Dr Sampath Kumar, CEO, MECDM bad Development Commissioner, u la pynshai ïa ka thong treikam jong ka mission bad u la batai ruh ia ka jingdonkam bad ka jing ia treilang hapdeng ka sorkar bad ki nongialam Niam bad ba kin lah ban ïatreilang na bynta ka roi ka par jong ki khynnah. Da kaba phai sha ka Baibl bad pule ia ka Proverbs 22:6, u kyntu ïa ki nongïalam niam ba kin pyndonkam ïa ki jingïalang sngi U Blei kum ki lad ai jingtip bad jingkyrshan ïa ka shnong.

Ha ka jingïalang kaba ar, la pynlong ia ki jingïalehkai ban pynpaw ïa ka jingsngewthuh halor ka jinghikai bad jingpynkhreh ïa ki khynnah. La kdew ruh ia ka jingdonkam ka koit ka khiah jong ki kmie kynthup ka jingduna snam ha ki kmie, bad kiwei kiwei ruh kiba iadei bad ka koit ka khiah kaba ia dei bad ki longkmie. La kyntu ruh ban don ka bynta jong ki shynrang ha ka jingïarap ïa ki kmie.

Ha kane ka jingialang la don ryngkat ruh ka A’chik Baptist Dal’gipa Krima (ABDK) ha kaba palat 200 ngut ki longkmie kiba long ki nongïalam balang ki la ai jinghikai halor ki rukom sumar khynnah. Ka jingïatreilang bad ka BAKDIL ka la nang pynïar shuh shuh ïa kane sha baroh 5 district jong ka Garo Hills: East Garo Hills, West Garo Hills, South Garo Hills, North Garo Hills bad South West Garo Hills.

Ha ka khubor khatduh, U Fr. Cyril Sangma u la pynshai ba ki nongïalam niam kin ai jingkyrshan ha ka jingïalang shnong, kin ai jinghikai hadien ka mass bad kin ïoh ruh ka jinghikai kaba biang shuwa ban pyntreikam. Kane ka jingïatreilang ka pyni ba ka Sorkar Meghalaya ka sngewkhia ban wanrah ka roi ka par na ka bynta u paidbah da ka jingïashim bynta jong ki paidbah hi.