Iatreilang ka KHADC bad ka World Bank ban pyntrei ia ka Solid Waste Management ha Ri-lum Khasi

Shillong, Risaw 09: Ka Khasi Hills Autonomous District Council (KHADC) kala pan ia ka jingkyrshan jong ka World Bank ban wanrah ia ka lynti kaban long shirta ha kaban weng noh ia ka jingeh na ka jingbym don jaka theh nuit ne don ia ka Solid Waste Management ha ki san tylli ki District kiba hap hapoh u pud u sam ka Council.

Kat kum ka jingong u Chief Executive Member (CEM) ka KHADC Bah Pyniaid Sing Syiem, ka Council kan sa aiti shen ia ka plan ba pura ha kaban pyntreikam ia ka Solid Waste Management Programme ban ai song pisa da ka World Bank.

Namar kane, kala don ruh ka jingialang hapdeng ka KHADC bad ki Heh ka World Bank ba long hynne ka sngi Nyngkong.

“Ngi la kyrpad ia ka World Bank ba kan ai jingiarap naduh kaba pynlong ia ka jingpynshai paidbah haduh ka jingbuh ia ki Resource Recovering Centre )RRC), ki ban iarap ha kaban lah pynbeit bha ia ka jingbret nuit ha ki shnong ki thaw haduh ki District” ong u Bah Pyniaid haba iakren bad ki nongthoh khubor.

“Ka thong ka long ban wanrah ia ka lynti kaban neh shirta ha kaban weng ia ka jingeh ba mih na u nuit. Ngim kwah ban shu pynkhuid ia ki jaboh na ki Shnong ki thaw bad shu bret pat sha kiwei ki jaka” ula ong.

U CEM ula pyntip ba ka World Bank kala kyrpad ia ka KHADC ba kan pynsted wut wut ia ki kam ki jam bad ong “Ka World Bank kala dep ban mang lypa ia ka song pisa. Namar kata, ngin hap ban pyndep bad aiti ia ka plan jong ngi ba kumno ngin pyntreikam ia kane ka Solid Waste Management Programme jong ka Council hapoh une u bnai ba mynta”.

Halor kane, u Bah Pyniaid ula pyntip ba ka Council kala rai ban iatreilang bad ki Dorbar Shnong lem bad ki Hima ha kaban pynlong ia ki jingialang pynshai paidbah ha ki shnong ki thaw kynthup ki Hima haduh ki District, ban pynsngewthuh ia ki paidbah ba kumno kin bret ia ki nuit khnang ba kan ym ktah ia ka mariang kynthup ki wah bad ki nala. Ia kine ki jingialang yn pynlong ruh ha ki skul, college bad ki iew ki hat.

Nalor kane, ula pyntip ba ka Council kala rai ban ithuh ia ki katto katne ki jaka ban pyntreikam ia ka pilot project da kaba buh ia ki RRC.

Ia mynta, ia ka RRC la buh tang ha shnong Mawlai Mawroh ha kaba ki nuit bala lum na ki thliew iing jong ka Shnong, la wanrah bad la pyniaphiah la la ka jong. Ka RRC kan iarap ruh ban die ia ki tiar kiba dang lah pyndonkam bad ki sboh bala pynmih na ki niut.

“Lada seisoh ka jingpyntreikam ia ka pilot project ha ka RRC, kan pynsting shi katdei eh ia ka jingkit ka Marten namar kan duna bha ka jingpoi ki nuit ha kane ka jaka” ula bynrap.

U CEM u pyntip ruh ba shen ka Council kan sa buh da ka dor ban lum ia ki nuit bad ban wanrah ruh ia ki kyndon dain kuna pyrshah ia ka jingtheh nuit pathar hapoh u pud u sam ka Council bad bynrap “Kane kan pynthikna ia ka jingiada ia ki wah bad ki catchment area. Ka Wahumkhrah bad Umshyrpi ki dei ki nuksa ia ka jingjaboh na ka jingbret pathar ia ki nuit”.

U CEM ula pyntip ruh “Ka Executive Committee ba thymmai kan sa kyrpad ruh ia ka World Bank ba kan buh ia ka Waste Management Plant. Kane kan dang shimpor”.
Haba kylli ia ka jingpyrshah u paidbah ia ka sienjam ka Sorkar ban thied jaka ha kaban pynlong jaka theh nuit, une u Khliehduh ka KHADC ula ong “Ka Sorkar lada kam kren shai bha balei ka donkam ia ka jaka, mano hi ban kloi ai ia ka jaka”.