Shillong Naitung 08: Ka skulbah North-Eastern Hill University (NEHU) kala shim ia ka sienjam ban nang pynsuhthied ia ka jingiatehlok bad ki jaka pule na Russia lyngba ka jingiakren da ki kor ki bor halor ka ktien ka thylliej bad ka jingiatreilang ha ka liang ka pule puthi.
Kane ka jingialang ka dei kaba la pynlong da ka jingthmu ban seng ia ka Russian Language Centre ha NEHU bad ban thaw ia ki lad ki lynti na ka bynta ka jingiatreilang ha ki snem ban wan ha kaba iadei bad ka pule puthi, jingwad bniah bad ka jingbit jingbiang ki samla.
Kane ka centre kaba la tyrwa, kan ai ia ki jingbatai halor ka ktien bad ban sngewthuh ia ka kolshor, ban pynkup bor ia ki samla pule ban ieng lang ryngkat bad la ki paralok kiba na kawei pat ka ri.
Ka NEHU bad ka jaka pule na Russia kila iakren ban don ia ka Joint Degree, ka jingsam mar kylliang ia ki jingnang jingtip hapdeng ki samla pule bad ki nonghikai, ka jingleh ia ka Internship bad ia ki Short-Term Certification Course.
Ka Ufa University of Science and Technology (UUST) kala pynpaw ia ka jingthrang ha kaban pdiang ia ki samla pule riewlum na ka thain shatei lammihngi jong ka ri India ban leh ia ka Internship, ki prokram kiba iadei bad ka pule puthi bad ka jingpynlong ia ka jingwadbniah lang.
U Vice Chancellor ka NEHU u Prof Prabha Shankar Shukla ula ong, “Kane ka sienjam kam dei eh tang halor ka jingai jinghikai ia ka ktien ka thylliej. Hynrei kadei na ka bynta ban pynkup bor ia ki samla pule ki jong ngi ba kin ieng ryngkat ryngkat bad kiwei pat kiba na kwei pat ka ri”.
Ka Rita Filippova, Vice-Chancellor for International Affairs, UUST kala ong, “Ngi dap da ka jingsngewtynand ban pdiang ia ki samla pule riewlum na ki jylla ka thain shatei lammihngi jong ka ri India ban iashimbynta ha Internship, Short-Term Academic Program bad ka jingwad bniah kaba kin ialeh lang ha Ufa.”
U Prof. Md. Iftekhar Hussain, Dean, School of Technology, NEHU ula ong, “Ngi dap da ka jingthrang ban wad ia ki lad ban don iaka Joint Degree Program, khamtam ha ka Engineering, Biotechnology bad Applied Sciences.”
Ka NEHU ka dang pynkhreh ban iasoi ia ka MoU bad ka Dr. Skill kaba dei ka kynhun kaba pawnam ha kaban pynioh kam kaban long ka lad ba ki samla pule kin iohkam iohjam ha kylleng ki ri.
 kala shim ia ka sienjam ban nang pynsuhthied ia ka jingiatehlok bad ki jaka pule na Russia lyngba ka jingiakren da ki kor ki bor halor ka ktien ka thylliej bad ka jingiatreilang ha ka liang ka pule puthi.){kind=link}