Shillong, Lber 10: Naduh ka sngi bala thung ia nga kum u Myntri ka tnat pule puthi nga la iakren bad u Myntri Rangbah ka jylla Conrad K Sangma ba ka sorkar kadei ban pynthikna ba ki nonghikai ki ioh ka tulop man u bnai.
Ia kane la pyntip da u Rakkam A Sangma haba kren sha ki lad pathai khubor hadien shi sngi ba u shimti kum u Myntri ka tnat pule puthi.
U Rakkam ula ong kum u nonghikai u kwah ban kyntiew iaka pule puthi hapoh ka jylla bad kane kan urlong lyngba ka jingiatreilang jong baroh naduh ka Sorkar, ki MLA, ki Sengbhalang, ki Nonghikai bad ki Samla pule.
U Rakkam ula ong ba kum u Myntri ka tnat pule puthi u kwah ba baroh kin ai jingmut kumno ban kyntiew iaka pule puthi hapoh ka jylla.
“Ka pule puthi kadei ka ba donkam bha hapoh ka imlang sahlang bad ban kyntiew ia ka pule puthi, donkam ban pynbit pynbiang iaki jingdonkam kum ki jingtei iaki kamra klas ba bha bad kumjuh ruh ban pynthikna ba ki nonghikai kidei ban ioh iaka jingsiew haka por ba biang” la ong u Rakkam.
U Rakkam ula ong ba ka sorkar MDA naduh 2018 kala leh bha haba iadei bad ka jingkyntiew iaka pule puthi hapoh ka jylla hynrei ka sorkar ka dang don shibun ki kam ba hap ban leh naka bynta ban kyntiew iaka jylla kum ka jaka pdeng haka liang ka pule puthi hapoh ka ri India baroh kawei.
Ula ong ba kum u Myntri un kyntu ruh ia baroh ki MLA ba kin shimkhia kumno ban wanrah jingkylla haka liang ka pule puthi ha la ki jong ki constituency bad ki MLA kidei ban wan shakhmat ban iakren lada donkam ha kano kano ka liang.
“Shen ngan sa lum ia baroh heh ophisar ka tnat pule puthi ban tip kumno ban pyntyllun ia ki kam khnang ba ka jylla Meghalaya kan paw biang kum pdeng haka liang ka pule ka dangle” ula ong.
