Shillong, Nohprah 09 : U Myntri Rangbah ka Jylla Conrad K Sangma ula lum ia ka jingialang jong ka Anti Narcotics Task Force (NTF), Meghalaya, hynne ka sngi Nyngkong, bad iasyllok ia ki buit treikam ban ratdyngkhong ia u droks hapoh ka Jylla.
Ha kane ka jingialang la iadonlang ruh u Symbud Myntri Rangbah ka Jylla Bah Prestone Tynsong, Myntri ka Koit ka Khiah Kong Ampareen Lyngdoh, Myntri ka Tnad Pule Puthi Rakkam Sangma, Myntri ka Social Welfare Paul Lyngdoh bad ka DGP Kong Idashisha Nongrang lem bad kiwei ki Heh Ophisar ka Sorkar.
Ka jingialang kala iatai bniah bha halor ki lai tylli ki sienjam ban shim da ki bor ka pyntreikam ia ka Ain, ka Tnad Pulit, ka jingtem ia ki jingma da ka Tnad ka Koit ka Khiah bad ka jingshngain ka imlang sahlang da ka Tnad Social Welfare.
Ka jingialang ka la iakren ia ki jingkylla kiba la ktah ha ka jinglong, ki kam bad ki rukom treikam jong ka ANTF bad la iakren ruh halor ka buit treikam ba la tyrwa bad ki jingiarap ki ba donkam na ki tnad bapher bapher kata ka tnad Ain, ka Koit ka Khiah, ka Pule Puthi bad ka Social Welfare.
Haba ai jingkren, u Myntri Rangbah ka Jylla Conrad K Sangma, u la ong ba donkam ban shim ïa ka rukom treikam kaba bun bad ong ba ka ANTF ka donkam ruh ban shong bad kawei pa kawei ka tnad ba dei peit ia kane ka kam bad ban leh eiei halor ka jingpyntreikam ïa ka buit ha ki bynta bynta bad ban don ia ka plan ba shipor, ba katto katne por bad ba bun snem.
“Ka jingtreikam jong ka ANTF ka long kaba iar bha kumta kan long kaba iahap bad don jingmut ban kheit shuwa ia ki soh kiba don hajan bad pyntreikam ia ki buit kum ka project ba shu pyrshang (pilot project) ha ki jaka ba jyllei eh u droks hapoh ka Jylla” ula ong.
U la bynrap ruh ba kane ka rukom treikam ka donkam ruh ban dei ka jingpyniakhleh ia ka jingbym aili haba buh ruh ha ka jingmut jingpyr khat ia ka jingsngew para briew ia kiba shah ktah ha u droks hapoh ka Jylla bad ong “Katba ki bor ka Ain kim dei ban aili iano iano ruh kiba don bynta ha ki kam shalan bad pyniaid iew ia u droks hynrei ka tnad ka Koit ka Khiah bad ka Tnad Socia Welfare ki hap ban shim ia ka kam ban ai jingiarap ia ki nongdih droks, ka koit ka khiah bad ban wanrah biang ia ki ha ka imlang sahlang. “Ula banjur ruh ia ka kamram jong ka Tnad Pule Puthi ban pynsngewthuh ia ki paidbah halor ka jingktah jong u droks”.
Ka jingialang kala iakren ruh halor ka jingleh test, bad ki rehabilitation cente nalor ki buit ban pynkut ia ki kam shalan droks shapoh ka Jylla.
