Shillong, Rymphang 25: Ka NEIGRIHMS ryngkat bad ka Zublee Foundation, & North Eastern Development Finance Corporation (NEDFi) ha ka sngi Saitjaiñ, kila pynhap pyrda noh ia ka Workshop halor ka phang ‘Deceased Organ Donation’ ne ka jingnoh synniang ia ki dkhot met ynda iap.
Ha katei ka Workshop kaba ar sngi la wan ban iashimbynta da palat 200 ngut ki nongiashim bynta kiba kynthup ia ki bor pyniaid hospital, ki doctor, Nurse bad ki nongtrei jong ka NEIGRIHMS ban pynsngewthuh bad ban ai jingtip ia ki shaphang jong ka jingsynniang dkhot met ynda la iap (Deceased Organ Donation) bad ka jingpyn bujli dkhot met (Transplantation).
Ka jingseisoh jong kane ka prokram kadei lyngba ka jingiatreilang jong u Prof. Ranendra Hajong, Department of General Surgery, NEIGRIHMS bad u Nodal Officer, SOTTO Meghalaya bad ka Priyanka Borah, CEO jongka Zublee Foundation bad ka kynhun ka jong ki.
U Prof. (Dr) C. Daniala, Medical Superintendent, NEIGRIHMS, ula ong, “Ka NEIGRIHMS ka iengskhem ban pynurlong shisha ia ka jingnoh synniang ia ki dkhot jong ka met na ka bynta kito kiba donkam bha. Ngi ngeit ba kane ka sienjam ka don ia ka lad ban iada ia ka jingim jong kiwei pat ha ki snem ban wan”.
Katba u Prof. Nalin Mehta, Director ka NEIGRIHMS, ula ong, “Kane ka workshop kala long ka rynsan kaba biang bha ia kiba don bynta ha kaban ai jingsumar, k isamla pule bad ia ki nongtrei ban ioh ia ki jingtip kiba bniah bad ban shimkhia ia kino kino ki bynta kiba iadei bad ka jingnoh synniang ia ki dkhot met ki jong ki”.
“Nga ngeit ba kane ka sienjam kan iarap shibun ha kaban pynsngewthuh bad ban pynshlur ban don ia ka jingiakren ban noh synniang ia ki dkhot met hapoh ka imlang sahlang jong ngi. Khamtam eh ha Meghalaya, ha kaba ka jingpynsgewthuh paidbah ia ka jingnoh synniang ia ki dkhot met ka long kaba dang duna bha bad kum kine ki workshop ki long kiba kongsan ban ai jingtip bad ban pynsngewthuh ia ki paidbah bad ban weng ia ka jingbym ngeit ka jongki bad ia ki jingsngewthuh bakala hynrei ban pynshlur ia ki paidbah ba ka jingnoh synniang ka jongki kan long pat ka jingiada ia ka jingim jong kiwei pat” ula bynrap.
