Shillong, Risaw 01 : Ka Sorkar Meghalaya kala shim ia ka sienjam kaba khraw bha ban kyrshan ia ki Longkmie ba khlem lok bad ka Iing ka sem jong ki, da kaba buh thong ban kyntiew ia ka kamai kajih jong ki 50,000 tylli ki longiing ka Jylla “kiba duk na kiba duk tam”.
Ka Sorkar Jylla dang shen kala iasoi ia ka Memorandum of Understanding (MoU) bad ka The/Nudge Institute da ka thong ban ai jingiarap pisa, kyntiew ia ka kamai kajih bad ka jingai jingiada ha ka imlang sahlang ia ki longiing kiba duk tam hapoh ka Jylla.
Lyngba kane ka jingiatehlok, ka Sorkar Jylla bad ka The/Nudge Institute kin iatreilang ban iakhublei kti bad ai jinghikai ha ki kam kamai kajih ia kiba longiing ba duk na kiba duk tak lyngba ki nongtrei ki ban buh ha ki shnong ki thaw.
Ia kane ka jingiatehlok la pynbna ha ka North-East Conclave ba long myn ha ka 27 tarik Nailur, 2024, kaba la pyniaid da ka Meghalaya State Rura Livelihood Society (MSRLS) bad ka The/Nudge Institute, ha Shillong.
Haba kren ha ka jingialang, u Principal Secretary bad Development Commissioner, Sampath Kumar ula ong “Ka Sorkar Meghalaya kala kut jingmut ban kyntiew ia ka rukom im jong ki 50,000 ngut ki longkmie ba khlem lok bad ki longiing ba duk na kiba duk tam ha ka Jylla ryngkat ka jingiatreilang bad ka The/Nudge Institute.
U Sriram V, Managing Director – Partnerships, The/Nudge Institute, ula ong “Ngi sngewkmen ban kyrshan ia ka Sorkar Meghalaya ha kaban nang pynkhlain ia ka prokram ban kyntiew ia ka rukom im jong ki Longiing ba duk lyngba ki lad jingiarap bapher bapher”.
