Shillong Nohprah 28: Ka Sorkar India ka la iasoi ki soskular bapher bapher ban pynkut ia ki kam pyntriem bad ban kyntiew ia ka roi ka par ha ka thaiñ shatei lammihngi kaba long katkum ka thong jong u Myntri Rangbah duh ka ri, u Narendra Modi bad u Amit Shah uba peit iaka kam pohiing haka ri.
Ka Sorkar India bad ka Sorkar Manipur ki la poi sha ka jingiasoi ia ka Cessation of Operation Agreement ha New Delhi ha ka 27 tarik u Nohprah bad ka Zeliangrong United Front, kaba la don mynta la palat shiphew snem bad kane kan pynsted ia kam iakren iasuk ha Manipur.
Ia kane ka soskular la iasoi da ki heh ophisar jong ka Tnat kam pohiing jong ka sorkar pdeng bad Sorkar Manipur bad ki dkhot jong ka ZUF ha ka jingiadonlang u Myntri Rangbah ka jylla Manipur u N. Biren Singh.
Ki dkhot jong ka kynhun lehnoh ki la mynjur ban sangeh ia ki kam thombor bad ban wanphai sha ka imlang sahlang ban bud ia ki Aiñ bad ki kyndon jong ka ri. Kane ka jingiateh soskular kan pynbiang ia ki jingdonkam jong ki dkhot jong kane ka seng ba kin wanphai sha ka imlang sahlang.
Nalor kane yn sa thung ia ka Joint Monitoring Group ban peit ia ka jingpyntreikam ia ki kyndon kiba la ia mynjur.
