Ri Bhoi, Naiwieng 19: Ban ialeh ban pynurlong iaka jingthmu ban kyntiew haka jingai iaka jingpule puthi kaba paka, hynne ka sngi saitjaiñ, ka University of Science and Technology Meghalaya (USTM) kala iasoi iaka Memorandum of Understanding (MoU) bad ka Jamia Hamdard University, New Delhi.
Ia katei ka MoU la iasoi da u Prof (Dr.) Mohammad Afshar Alam, Vice Chancellor jong ka Jamia Hamdard University bad u Prof GD Sharma uba long u Vice Chancellor ka USTM, ha kaba la iadonlang u Chancellor ka USTM u Mahbubul Hoque, u Pro VC u Dr BK Das bad kiwei kiwei.
U Prof Alam ula buh ruh ia u mawnongrim jongka Centre for Competitive Examination ha ka Academic Block- Q jongka USTM.
Haba kren ha katei ka sngi, u Prof Mohammad Afshar Alam ula ong “Kane kadei ka sien kaba nyngkong ia nga ban wan ha USTM bad nga hap ban ong ruh ba u Mahbubul Hoque udei u Sir Syed jong ka thaiñ shatei lammihngi jong ka ri, ne lah ruh ban ianujor ia u bad u Hakeem Abdul Hameed u Nongseng jongka Jamia Hamdard.
Ula ong, ka USTM ka don ha ka map jong ka ri namar u Vice Chancellor u Prof GD Sharma udei u Vice President jongka AIU bad ha u snem ban wan yn sa shimti syndon kum u President bad kumta ka USTM kan sa ialam syndon ia ki skulnbah hapoh ka ri India bad kane ka long kaei kaei kaba sngewsarong bha.
U Alam ula pynpaw iaka jingthrang ban wan jngoh biang iaka USTM bad ban pynlong iaka training naka bynta ki nonghikai jong kane ka skulbah.
“Mynta ka sngi, ngi la pyndep ia ka jingiasoi iaka MoU bad nga sngewsarong bad nga kloi ban iarap iaka USTM ha kino kino ki bynta, kamtam haba ngi wan hakmat eh ha ka Pharmacy. Nga khot sngewbha iaki nonghikai ha ka Pharmacy ban wan sha ka jaka pule ka jong ngi, ban ioh jinghikai. Ngi don ka jingiatreilang bad ki kynhun na kylleng ki ri ha kaba iadei bad ka Pharmacy, Virology, Molecular medicine”, la ong u Alam.
Katkum ka MoU, kine baroh ar ki skulbah kila mynjur ban iatreilang halor kiba bun ki mat kiba iadei bad ka thaiñ shatei lammihngi, kaba kynthup naduh ka ktien, ki kolshor, ka rukom bam bad kiwei kiwei.
Ka Jamia Hamdard kan ailad ruh ia ki katto katne ki samla pule ka USTM ba kin leh ia ki Project ha Jamia Hamdard bad ka Jamaia kan kynthup lang ruh ia ki katto katne ki nonghikai ka USTM ba kin long ki nongkhmih bniah ia ki projek na ka bynta ban ioh iaka jingbei tyngka nalor ka jingpynlong ryngkat lang ia ki Seminar, Symposia, Workshops bad kiwei kiwei.
