Shillong, Rymphang 28 : Ka Sorkar Meghalaya hynne ka sngi Balang, kala iasoi ia ka Memorandum of Understanding (Mou) bad ka 1 Million for 1 Billion Foundation (1M1B) ban seng ia ka Green Skills Academy kaba ar ha India bad ba nyngkong ha Jylla, na ka bynta ki samla ha Shillong.
Kane ka Green Skills Academy ka dei kaba la shna kyrpang na ka bynta ki samla pule college kiba la palat 18 snem ka rta bad ka thong jong ka project ka long ban aibor ia ki samla ba kin lah kynjoh ia ka sap treikam kaba pura da ka jingkyrshan ruh ia ka koit ka khiah bad ka bha ka miat, ka ban pynthikna ia ka jingroi jingpar kaba bteng hapoh ka Jylla.
Ka thong ka long ban ai jinghikai haduh 1 lak ngut ki samla halor ka Green Skill napoh ka Jylla ha kine ki san snem ban sa wan bad kan jied ruh ia 10 ngut kiba wan shakhmat ba kin ai jingkren ia ka kam ba ki trei hapoh ka 1M1B summit ka ban long ha United Nations ha New York.
Ia kane ka MoU la iasoi hapdeng ka Meghalaya Multisectoral Project for Adolescent Wellbeing Empowerment and Resilience (MPOWER) – Planning, Investment, Promotion and Sustainable Development Department, ka Tnad Pule Puthi, Information Technology & Communication (IT&C), Meghalaya State Skills Development Society, ka Jylla bad ka 1M1B Foundation.
Ia kane ka soskular ia iasoi ha ka jingiadonlang u Sampath Kumar, Development Commissioner & Principal Secretary, bad u Pravin Bakshi, Commissioner & Secretary, Information Technology, & Communication (IT&C) lem bad ka Deepika Venkatesh, Program Manager- Green Skills & Sustainability, 1M1B ha ka jingialang ba long ha Additional Secretariat, Shillong.
Haba pynpaw ia ka jingshaniah ia ka sap ba ki samla ka Jylla ki don, u Myntri Rangbah ka Jylla Conrad K Sangma ula ong “Ka long kaba sngewtynnad ban iatreilang bad ka 1M1B ha kaban seng ia ka Green Skill Academy hangne ha Meghalaya ka ban nang pynkloi ia ka jingnang jingtip halor ka green skill hapdeng ki samla pule college ka Jylla”.
