Shillong, Nailur 05: Ka skulbah North-Eastern Hill University, hynne ka 5 tarik u Nailur, kala iasoi soskular bad ki 9 tylli ki kynhun kiba dei ki Institute bad University ba pawkhmat ka Ri na ka bynta ban pynkhlain iaka kam wad bniah ha katei ka skulbah.
Ia kane ka soskular la iasoi ha ka jingiadonlang u Lat ka Jylla u Satya Pal Malik uba long ruh u Chief Rector jong ka skulbah. Kane ka jingiasoi Soskular ka long ruh kum shi bynta jong ka jingrakhe iaka Teachers Day.
U Lat ka jylla haba ai jingkren, ula iaroh ia u Vice-Chancellor (VC) ka NEHU, u Prof. Prabha Shankar Shukla uba la trei shitom ha kine ki shi snem shiteng ban rah shajrong ia ka kyrdan bad ka burom jong ka skulbah bad ula iaroh ruh iaka jinglah jong u VC ban wanrah ia ki kynhun ban ioh iaka jingiatreilang ha kajuh ka por kaba long kaba donkam tam iaka NEHU ha kane ka khyllipmat.
U la ong, ba ha kane ka por kaba mynta ka long kaba kongsan ban leh ia kino kino ki kam wad bniah na ka bynta ban pynbeit ia kiba bun ki jingeh bad ban pynlong iaka ri kaba ieng hala ki jong ki kjat, hynrei namar ka jingduna palat ban ioh iaka jingiatreilang kumta ka jingkiew kam da don than eh.
U Satya Pal Malik u la ong, ka sorkar kadei ban mang kham bun iaka tyngka ha ka pule puthi bad kino kino ki ain kiba iadei bad ka pule puthi kiba la mynjur ha Parliament khlem da don ia ka jingiatai ka long kaba lehraiñ namar ka pule puthi kadeikaba tei iaka pateng ban dang wan bad ia ka Ri bad ula ai nuksa ba ka ri England kam ju pynduna iaka bhah tyngka haka pule puthi bad ka ri India ruh kadei ban budlang kumjuh.
U Malik ula ai khublei ruh ia ki nonghikai jong ka Skulbah NEHU khamtam haba hynne ka sngi kadei ka sngi kyrpang jong ki nonghikai ne ka Teachers Day bad ula ai khublei ia u Vice-Chancellor bad ia ka kynhun jongu halor ka jinglah ban iasoi iaka soskular bad ki jaka pule kiba paw bad ki karkhana.
U VC ka NEHU Prof. Prabha Shankar Shukla u la ong ba ki MoU kiba la iasoi kin plie lad iaka skulbah bad kumjuh ia ki jaka pule bad ki kompani ban pyndonkam ia ki kor ki bor na ka bynta ban wanrah iaka jingkylla ha ka kam pule bad ha ki kam tih bniah.
Ka NEHU kala iasoi iaka MOU bad ka CSIR- National Botanical Research Institute (NBRI), Lucknow, CSIR-Institute of Toxicology Research (IITR), Lucknow, G.B. Pant University of Agriculture and Technology, Pantnagar, Sawaiom Fresh, Shillong, TURBIT, Shillong, National Cooperative Development Corporation (NCDC), New Delhi, JDBP Agri International Pvt. Ltd. (Meerut), Regional Centre for Biotechnology, DBT, Faridabad bad Golden Signatures Research & Consulting, Delhi.
Ha katei ka jingsoi MOU ka long ban wad bniah (Research) da kaba iatreilang ha ka Biotechnology, Environmental Science, Pharmacology, Genetics, Plant Breeding, Agricultural Sciences, Plant Conservation, Agro-technologies, Food, Drug, Chemical, Computational bad Regulatory Toxicology ryngkat bad ka Health Toxicology Assessments bad ka jingiatreilang bad ki karkhana ha kaba iadei bad ka rukom sengkam, ban ai jinghikai kyrpang ia ki khynnah kiba kwah ban long ki nongseng kam, ban pyni iaka rukom treikam jong ki kor ki bor bad kiwei kiwei.
