Shillong, Risaw 31: U Myntri Rangbah ka jylla u Conrad K Sangma, hynne ka sngi ula iashimbynta ha ka jingialang pynhap pyrda ia ka jingrakhe Wild Life Week 2023.
Haba kren ha ka jingialang, u Conrad K Sangma, ula ong, ba ka tnad Forest kadei kawei na kiba kongsan kaba ka sorkar ka pynleit jingmut bha.
“Ngi la iaid mynta ha ka lynti ban iada iaki khlaw ki btap bad ka mariang bad ngin trei ha ka dur kong ka mishon da kaba pynleit jingmut ha ki mat kiba kongsan ban pynthikna ba ka tnad kan iaid shakhmat bad ngin pynthikna ruh ba ngin ai ia ka jingkyrshan, ka jingbei tyngka bad jingbtin lynti ia ka tnad Forest” ula ong.
Ula ong ruh ba ka Meghalaya kadei kaba la kyrkhu bad kaba don kyrpang ia ki mrad ki mreng hynrei haduh mynta ym shim la lah pat ban iaid shaphrang ha ka lynti kaba la pynwandur bha bad ha ka jingstad saian.
U Myntri Rangbah ula banjur ruh ia ka jingkongsan ban iatreilang hapdeng ka sorkar bad ki paidbah.
Ula banjur ruh ia ka jingdonkam ban don iaka Elephant Corridor ne ka lynti iaid ki hati hapdeng ka jylla Assam, Meghalaya bad ka ri Bangladesh.
“Nga kloi ban iatreilang bad ka sorkar Assam bad ki kynhun bar ri ban pynwandur iaka elephant corridor kaban long ka jingiada bad ban plie ia ka lynti ia ki hati ba kin iaid da kaba suk” ula ong.
Ula iathuh ruh ba survey halor ka jingdon ki Hati bad kiwei pat ki mrad ha ka jylla kadei ka mat jong kane ka tnad sorkar.
“Kadei tang lyngba ka survey bad lyngba ki jingtip kiba don kaba ngin lah ban shna ia ki polisi treikam kiba biang kaban iarap ban ia imlang hapdeng ki briew bad ki mrad,” ula pyntip.
Hashwa kane u Myntri Rangbah bad ki heh ophisar kila ai khusnam sha ki nongtrei jong ka Wildlife halor ka jingtrei shitom ka jongki bad la sam ruh ia ki khusnam sha ki nongjop ha ki jingiakob bapher bapher kiba la pynlong shi bynta jong ka jingrakhe ia ka Wild Life Week.
