Shillong, Nailur 19: Ki la don haduh kumba 200 ngut ki nong mareh na kylleng ki bynta jong ka Ri bad wat na shabar ri ruh kiba wan ban shim bynta ha ka Mawlynnong Runsafari Half Marathon kaba la pynlong ha kane ka sngi Saitjain ha Mawlynnong ka shnong kaba don ha khappud jong ka India bad Bangladesh.
Ia katei ka marathon la pynlong ha ki lai bynta, kata ka ha ka thup kiba 21.1 km, 12 km bad 5 km. Ki nongmareh ki hap ban mareh ia ki lai tylli ki shnong kata ka shnong Mawlynnong, Nohwet, Riwai bad shaduh Nongeitniang.
Ym tang katta, ki nongmareh ki hap ruh ban mareh lyngba ki lynti shnong, ki lum ki wah bad teng teng ruh ia ki jingkieng jri.
Ia kane ka jingiakob mareh thong la pynlong da ka jingiatrei lang hapdeng ka Tourism department jong ka Meghalaya, Social Empowerment department of Meghalaya, DC East Khasi Hills, SDO (Civil) Pynursla, Shillong Press Club bad ka shnong Mawlynnong ryngkat ki shnong ba marjan.
Ia katei ka jingiakob mareh la wan plie pyrda da ka SDO (Civil) Pynursla Kong E.L.Warjri ha ka por mynstep ryngkat ka jingdonlang u SR Chowdhury (Retd. Assistant Director, Ministry of Tourism, ka sorkar India, Eastern region).
Ha katei ka sngi ki la don ruh haduh kumba 50 ngut ki nongmareh na Bangladesh bad bun na ki ki la pynpaw ia ka jingkmen ba iohi ia ka mariang kaba ithiang.
Ha ka jingiakob mareh kiba 21.1 km ha ka liang ki kynthei ia ka nam lahduh la ioh da ka Darishisha Langjuh kaba mareh ha ki 01.53.53 kynta, nangta ka Bandasharai Marwein kaba wan baar da ki 02.01.11 kynta bad ka Ibanriakor Lyngkhoi da ki 02.12.06 kynta.
Ha ka liang ki kynthei ba la noh rta, ka Kong Kmoin Wahlang 74 snem ka la pyndep ia ka kyrdan ba nyngkong ha ki 02.12.32 bad ha ka liang ki shynrang ba la noh rta u Bah Jefferson Kharnaior 55 snem u la pyndep ia ka thong ha ki 01.55.26 kynta.
Ha ka thup ki shynrang ha ka mareh ba 21.1km, u Jomsigstar Ramsiej u la pyndep ia ka thong ban khur ia ka kyrdan ba nyngkong ha ki 01.22.42 kynta, bud sa u Batsrang Sangma ha ka kyrdan kaba ar ha ki 01.25.01kynta bad u Revaldo Rynjah ha kyrdan kaba lai ha ki 01.32.35 kynta.
Ki nongjop ha ka 12KM jong ki kynthei ki long :
1. Daphishisha Khongsan – Meghalaya – 01.25.44 kynta
2. Kerrenner Wahlang Syiemlieh – Meghalaya – 01.31.19
3. Philakyntiew Nongrum – Meghalaya – 01.35.36
Ki nongjop ha ka 12km ki shynrang :
1 – Dondor Nongkynrih -Shillong- 00.59.11 kynta
2- Kyntiewbor Kharluni – Meghalaya – 01.0152
3- Madan Rai – Assam- 01.03.21
Ha ka thup ki shynrang ba kham heh ia ka nam lahduh la ioh da u Bah Kedric Kharpor na Shillong.
Ha ka thup kiba 5KM ha ki kynthei ia ka kyrdan kaba nyngkong la ioh da ka Ibapyntngenlang Kharunni – Shillong, kyrdan ba ar da ka Baphilakyntiew Kharunni bad kyrdan ba lai da ka Pinki Halder na Kolkata.
Ha ka liang ki shynrang pat ha ka mareh ba 5KM ia ka kyrdan ba nyngkong la ioh da u Zublin A Sangma na Shillong, bud sa u Elect Shadap ha kyrdan ba ar bad u Keshar Gupta n Kolkata ha kyrdan kaba lai.
