Shillong Naitung 23: Da ki spah ngut ki paid nongshong shnong jong ka Nongbah Shillong, hynne ka Sngi U Blei kila ia mih ban iashimbynta haka jingthang mombati ne Candle Light Vigil naka bynta ban don noh iaka jingsuk haka jylla Manipur kaba dang don mynta hapdeng kajingiakynad.
Ia kane ka jingthang mombati la pynlong da ki Manipuri kiba shong basah ha nongbah Shillong hapoh ka kynhun Manipur Support Group, ha Don Bosco Square, Laitumkhrah da ka jingthmu ban pynpaw iaka jingsngewlem sha ki lanot kiba la mad ia ki jingsngewsih kthang bad ban buh jingduwai khnang ba ka shongsuk shongsaiñ kan wanphai biang ha ka jylla Manipur.
Ki nongiashimbynta kila bat hala ki kti ia ki mombati bad buh jingduwai kyrpang naka bynta ki paidbah ka jylla Manipur bad ban pynsaphriang ruh ia ka khubor ba ki paidbah ka thaiñ shatei lam mihngi ki iatylli lang kawei bad ki thrang ban don ia ka jingsuk.
Ki paidbah kiba la iashimbynta kila rah ruh ia ki jingthoh ban pynrem jur ia ki runar kiba la donkti ha kaban pyniaid lyngkhuid ia ki Ar ngut ki longkmie bad leh khlem akor ia ki bad kila dawa ba dei ban pynshitom da kaba tyngeh ia kine kiba leh iaka kam runar ia kaba ka imlang sahlang bad ka pyrthei hi baroh kawei kam lah ban pdiang satia.
Haba kren bad ki nongthoh khubor, katto katne ngut ki jaitbynriew Kuki, ki la ong ba tang kawei kaba lah ban wanrah ia ka shongsuk shongsaiñ ha ka jylla Manipur, kata ka long ban ai noh la ka jong ka sorkar na ka bynta ka jaitbynriew Kuki bad ki Meitei.
Kila dawa ruh na ka sorkar ba kadei ban shimkhia mardor ia ki lad ki lynti ban wanrah ia ka shongsuk shongshngain ha ka jylla Manipur khamtam haba kane ka jingiakynad bad ka jingiaumsnam kala neh slem bha bad kala buh ia ka jingim jongki paidbah ka Manipur haka jingtieng bad jingsyier.
Pule lang ia kane: ‘Ka jylla kam pat long kaba kloi ‘: Pyrshah ka NEHUSU ban pyntreikam iaka NEP 2020
