Shillong, Lber 09: U Myntri Rangbah ka Jylla Conrad K Sangma, ula ai ka jingiaroh ia ki Pulit ka Ri-Bhoi kiba la ioh kem ia u snar khaii droks bar jylla bad ioh kurup ia u heroin ba shongdor haduh T. 75 lak.
Haba thoh ha X, u Myntri Rangbah ula iaroh ia ka jingtrei shitom jong ki Pulit ka Jylla bad pynpaw ia ka jingsngewnguh ia ka jingaiti bad trei shitom ban iakhun pyrshha ia ka jingkhaii droks hapoh ka Jylla.
Ula ai khublei ia ki Pulit ka Ri-Bhoi halor ka jingioh lum ia ki khubor syntiat kiba paka bad ka jingbuddien kaba lam sha kane ka jingioh kurup.
Kane ka jingioh kurup droks kala jia ruh ha East Khasi Hills District kaba mih na ka jingtohkit ia ki nongkhaii droks bad lam pat sha ka jingiohkem biang sa arngut ki nongkhaii droks bad ioh kurup ia ka pisa ba T. 1 lak lem bad ka kali ha Nongbah Shillong.
“Ka jingkloi ban shimkhia jong ki Pulit kala pynpulom ia ka jingthmu ba sniew jong ki nongkhaii droks” ong u CM haba iaroh ia u DGP LR Bishnoi bad ka kynhun ia ka jingtrei khlem shongthait.
