Nongpoh, Lber 09: Ka ding kaba klang bha, kala bam duh ia kawei ka kudam synsar/sying bad ka beauty parlour hynne ka step phyrngap sngi saitjain hapoh ka shnong Umsawnongkharai, Ri-Bhoi District.
Kine ki dukan ki dei ba long trai da u Bah Reland Syngkli uba la aiwai ia ka kudam sha ka kong Phlinda Shylla bad ka beauty parlour sha ka kong Sabina Lapang.
Kane ka jingpluh ding kala jia ha ka por 3:30 baje eiei mynstep hynrei ia ka jingkem ding kine ki dukan la lap da ki nong shongshnong ha ka por kumba 5 duna eiei mynstep. Namar ka jinglap slem, ki thylliej ding kila ioh ban bam ingkhong khait ia kine ki dukan bad ki jingdon jingem baroh.
Ki nongshongshnong kila iamih paidbah ban iakhun ia ka ding ba kan nym pur sha ki dukan ba don ha syndah bad da ka wan poi kloi ki kali pynlip ding na Nongpoh Fire & Emergency Service, la lah ban pynlip noh ia ka ding.
Haduh ba thoh ia ka khubor ym pat lah satia ban tip ia ki daw ka jingpluh jong kine ki dukan hynrei ka jingtohkit mynta kala iaid shakhmat ban lap ia ki daw tynrai.
