Iaroh u Bah Hek ia ka Tnad Veterinary ba ai iaki jingbam & jingdih ba shngaiñ iaki paidbah

Shillong, Iaiong 27: Ka Meghalaya State Veterinary Council hynne ka sngi Saitjain kala rakhe ia ka World Veterinary Day da kaba pynlong ia ka jingialang ha Directorate A.H & Veterinary Shillong halor ka matpdeng “Veterinarians are Essential Health Workers”.

Ha kane ka jingialang la wan ban iashimbynta da u Myntri Sorkar uba khmih ia ka tnad Animal Husbandry & Veterinary u Bah A.L Hek ryngkat bad ka Kong R.M. Kurbah, Secretary of the Animal Husbandry & Veterinary bad kiwei kiwei ki heh ophisar ka jylla.

Ka Kong R. M. Kurbah, haba ai jingkren kala banjur ia ka jingkongsan ban don ka jingiatreilang hapdeng ka tnad ka koit ka khiah bad ka tnad Veterinary ban shimkhia ha kaba iadei bad ki lad jingiada ia kino kino ki jingpang bad kala ong ba dei ban phaikhmat ha kaban iada ia ka jingpang ban ia kaba pynkhiah ynda la iohpang.

Nalor kane, kala kyntu ba dei ruh ban pyndonkam ia ki rynsan Social Media ban pynsngewthuh ia ki paidbah shaphang ka jingkhuid jingsuba bad kiwei kiwei ki mat kiba iadei bad ka tnad Veterinary.

Katba u Bah A.L Hek ula ai ka jingiaroh iaka tnad Veterinary ha kaban pynthikna ban ai ka jingshngaiñ ia ki paidbah lyngba ka jingsam ia ki jingbam bad ki jingdih ki bapher sha ki paidbah.

Ula banjur ba ka long kaba kongsan ban don iaka jingtrei shitrhem bad ban don ia ka jingkitkhlieh na ka bynta ban pyniaid shakhmat ia ki kam ki jam jong ka tnad bad ban pybna nam bha shuh shuh ia ka tnad Veterinary.

U Bah Hek ula kren ruh shaphang ka jinglah kane ka tnad sorkar ban thaw ia ki lad ki lynti ha kaban aikam aijam ha ka jylla bad ula banjur iaka jingdonkam ban trei bha iaki kam ki jam.