Tura, Nailar 19: Ki Pulit ka East Garo Hills kin sa leit ban shaw noh ia uwei u samla na Williamnagar uba shah bat ha ki bor pyniaid ka Gunthur Railway Station ka Andhra Pradesh.
Une u samla ba kyrteng u Tengrik Momin bana DC Colony, Williamanagar ula mih na Ri-lum Garo bad ki katto katne ki paralok ban leit sha Goa ha kaban wad kam wad jam.
Hynrei namar ka jingbym don ticket rel, ula shah bat noh ha ki bor pyniaid ka Gunthur Railway Station. Une u samla ula pyntip ia kane ka jingjia sha ka hynmen kaba la pyntip pat sha ki Pulit ba kin ai jingiarap lem.
U Superintendent of Police ka East Garo Hills u Bruno A Sangma u iathuh ba ula phone sha ki Pulit ka Andhra Pradesh ban pan jingiarap ha ka ban pynbiang biang ia une u samla bad kiwei kiwei ki jingdonkam.
“Ka kynhun jong ngi kan sa mih lashai ka sngi ban wan ialam noh ia une u samla shala iing” ula iathuh.
Une u samla ula mih nala iing ha ka 15 tarik Nailar.
