Nongpoh, Nohprah 22: U wei u briew u la khlad hashen katba lai ngut kiwei kynthup ia u nongniah ka auto rickshaw ki la mynsaw jur hadien ba ka auto rickshaw kba ki shong ka la kylla khongpong na ka jingniah sted u nongniah.
Kane ka jingjia ka la jia ha u surok bah National 06 ha ka shnong Umsawnongkharai.
Ka tyllong khubor na ki pulit, ka iathuh, ba kane ka jingjia aksiden ka la jia ha ka por 8 shiteng mynstep bad kane ka auto rickshaw kaba don ia u number ML 10 B 6460, ka dei kaba dang kiew na thain Quiñine.
La ong ba u nongniah ula pynher sted ia ka kali bad hamar ba poi ha kawei ka khongwain, kane ka auto rickshaw ka la kylla khongpong noh namar ka jingbym lah ban tehlakam shuh u nongniah.
U wei u rangbah u la khlad noh hashen ia u bad la tip kyrteng kum u Bah Stom Siangshai (37) ba shong basah ha ka shnong Pahamriniai. Ia ka met la rah noh sha Civil Hospital Nongpoh ban leh ia ka post mortem katba ia kiwei kiba la mynsaw la pynkit sha Umsning CHC ban ioh jingsumar.
Na ka liang ki pulit ka Nongpoh Police Station ki dang pynlong ia ka jingtohkit halor kane ka jingjia.
