Shillong, Naitung 27 : Ka jingthombor bala suba leh da ka kynhun, kala shim ia kawei ka mynsiem briew bad arngut kila mynsaw ha ka miet sngi U Blei ha East Khasi Hills District, bad ki Pulit kila suba jur ba kine ki lanot ki dei kiba ia ithuh ithaw para maki.
U Superintendent of Police Bah Vivek Syiem ula iathuh ba ia u lanot ba nyngkong la lap ha ka por 10:30 baje mynmiet hajan ka khyrdop ka BSF Battalion ryngkat ka jingmong ba shah dung.
“Ki shipai BSF kila pynkynriah ia u sha NEIGRIHMS bad mynta u dang don hapdeng ka jingsumar” ong u Bah Vivek haba iakren bad ki nongthoh khubor ha ka sngi Nyngkong.
Tang hadien shikynta, ki Pulit kila ioh khubor sa ia kawei ka met kaba lap ha Mawkasiang.
“Ngi la ioh khubor ha ka por mynsiem ia ka jingdon kawei ka met kaba don bun ki dak mong ba shah dung ha ka thain Mawkasiang. Ia kane ka met la pynkit sha hospital ban leh post mortem. Ngi la register case halor kane ka jingjia bad ka jingtohkit kala sdang” ula iathuh.
Ia uwei pat u briew ba dei na kajuh ka kynhun la lap ha Mawtawar ryngkat ki dak mong. “Ia une ruh la pynkit sha Hospital. Ka por ba kine baroh lai ngut ki dei kiba iadonlang” ong u SP.
Une u briew uba iap la tip kyrteng kum u Shanbor Rani, ia uba ki Pulit ki iathuh ba u dei uba la don dak teng ba leh kam bymman.
“Ula donkti ha kiba bun ki case kynthup ka jingpyniap briew bad ki kam bymman ba hap hapoh ka NDPS Act” ong u bah Vivek.
“Ia mynta ngim pat lah ban pynthikna ia kaei kaba jia. Ka lah ban don jingiadei bad u droks lane ka jingpynhiar kput. Ka jingtohkit kan sa lap balei ba u Shabor Rani u shah pyniap” ula ong.
Ki Pulit kila pynthikna ba ka kali kaba lap na ka jaka ba lap ia u Shabor ka dei jong u Shanbor.
