Shillong, Naitung 27 : Uwei u samla ula iap hashen bad arngut ki paralok kila mynsaw jur haba ka scooty ba ki iashong, la suba ba ka shah rat ha ka trok ha ka step synnia ka sngi Nyngkong ha Umiam Dyke, Ri-Bhoi.
Kane ka jingjia kala jia ha ka por 12:35 baje mynstep, ong ki Pulit kiba iathuh ba ha ka jingleit tohkit, kila lap ia 3 ngut ki samla kiba la thiah lyngktar hapdeng ka jingmynsaw lem bad kawei ka scooty ba don u nombor ML05-AG-7001.
Ki iathuh ba ha ka jingtohkit, la shem ba uwei napdeng jong ki, ula iap hadien ka jingmynsaw na ki bynta ka khlieh bad la tip kyrteng ia u da u Rahul Ch Sangma ba na Kapisapara, South Garo Hills. La ithuh ia u lyngba ka Aadhaar Card bala lap na ka pla patlun jong u.
Ia kiba mynsaw la pynkut noh mar mar da ki ambulance 108 sha Civil Hospital, Shillong ban ioh jingsumar.
Ki Pulit ki pyntip ba na ki dak taiar ha surok la suba jur ba ka dei ka trok kaba rat ia kine ki samla hynrei ym shym la lapdien shuh ia ka lait tang kitei ki laingut bad ka scooty.
Ia ka metiap la pynkit noh sha ka jaka buh metiap ka Civil Hospital Nongpoh ban pyndep ia ka post mortem. Ki Pulit kia register case halor kane ka jingjia bad ka jingtohkit mynta kala iaid shakhmat.
