Nongpoh, Jylliew 04 : Kawei ka samla ba pule Law ha Guwahati Law College kala iap bad 5 ngut kila mynsaw jur ha ka jingjia aksiden kali kaba jia hynne ka step phyrngap ha surok NH-6 ha Shangbangla, Ri-Bhoi District.
Kane ka samla ka kyrteng ka Namrita Borah ba 25 snem ka rta, ong ka khubor Pulit.
Ki iathuh ba hynne ka step por 4:44 baje, kawei ka kali Hyundai Alcazar (7 seater) ba don u nombor AS01-EV-9579, ba niah da u Md Ismail Hoque Choudhury, kala leit tynrah ia kawei ka trok ba ieng harud ka surok Shangbangla. Kane ka jingleit tynrah kala jia na ka jingknieh iaid shakhmat ia kawei ka kali.
Ki Pulit ki iathuh ba kane ka kali kaba iashong hynriew ngut ki briew, ka dei kaba hiar na Shillong ban leit sha Guwahati hynrei haba poi ha katei ka jaka, kala iakynduh ia kane ka jingjia.
Ki Pulit ki iathuh ba ka Namrita kaba shong markhap ka jingkhang ba hadien, kala mynsaw jur na ki bynta ka khlieh bad la pynkit mar mar ia ka sha Civil Hospital, Nongpoh da ka kali paidbah ba kan ioh jingsumar hynrei ki doktor kila pynbna ba kala iap ha lynti.
Kiwei pat kiba mynsaw ki kynthup ia u nongniah MD Ismal Hoque Choudhury, u Anayatul Watus, ka samla Gayatri Borah, ka samla Pragya Dihingia bad u Meriganka Borah.
Ia ka met jong kane ka samla la buh ha ka jaka buh metiap ha Civil Hospital ban pyndep ia ka post mortem. Ha ka jingthkit la shem ba ia kane ka kali Hyundai la kit noh sha Guwahati, Assam hashuwa ka jingwan poi jong ki Pulit ha katei ka jaka.
