Shillong, Iaiong 12 : Ka Meghalaya kala ioh ia ka jingiap haduh 92 ngut ki briew bad 58 tylli ki hati ha ka jingiatyngkhuh hapdeng ki briew bad ki hati ha kine ki 16 snem bala leit, kaba pyni ia ka jingjia ba dang iai bteng ba kum kine, watla ka long kaba kham duna ha ka Jylla.
Kat kum ka Nationak Study, haduh 7868 ngut ki briew kila iap na ka jingiatyngkhuh bad ki hati ha ki 16 tylli ki Jylla hapdeng u snem 2009 bad 2024, kaba kot kumba 492 ngut ha ka shisnem.
Ka Odisha ka dei kaba don bun eh kiba iap kaba kot haduh 1495 ngut, bud sa ka West Bengal-1306, Jharkhang-1205 bad Assam-1161 kaba kot haduh 70% ka jingiap ki briew tang ha kine ki saw tylli ki Jylla. Ki Jylla kum ka Tamil Nadu-747, Chhattisgar-782, Karnataka-520, Kerela-290, Meghalaya-92 bad Uttarakhand-132. Tang khyndiat eh ki jingjia la jia ha Nagaland-9, Tripura-13 bad Maharashtra-17.
Ka jingwad bniah ka pynpaw ruh ba ka jingiap jong ki hati ha kylleng ka ri India ka dei eh na ka daw ka jingiatyngkhuh bad ki briew, bad ka jingiatakhuh ia ki sainar elektrik.
Ha Meghalaya, ka jingiap jong ki hati ka dei eh na ka jingiatakhuh bad ki sainar elektrik, kaba pyni ia ka jingma kaba buh da ki jingtei ba pynmih bording ha ki jaka khlaw.
Ka Seng ba khmih ia ki mrad khaw na Assam Aaranyak kala treikam ha Meghalaya ban ai ia ki lad ki lynti kiba treikam na ka bynta ban pynduna ia ka jingiatyngkhuh hapdeng ki briew bad ki hati bad kumjuh ruh ban kyntiew ia ka jingpynneh pynsah ia ki hati ha ka jylla.
