Siliguri, Risaw 6: Kumba phra ngut ki briew kila ngam jyllop bad bun ngut kila jah rngai na ka jingshah rong ha ka umsaw kaba wan poi kynsan kynsan ha ka Wah Mal katba ka jingpynngam Blei Durga ka dang iaid shakhmat ha Vijatashami, ong ki heh Sorkar.
Haduh saw ngut na kine kiba iap ki dei ki kynthei.
Kane ka jingjia kala jia hynnin ka miet sngi Balang por 8.30 baje eiei katba ki briew ba da ki spah ngut ki dang ialum ha Wah Mal ban iashimbynta ha ka jingpynngam Blei Durga.
“Kynsan kynsan kala wan poi ha umsaw bad kala rong ia bun phew ngut ki briew. Haduh mynta, ngi la ioh tam haduh phra tylli ki metiap bad ngi la ioh pyllait im ia palat 50 ngut. Ki dang don ruh bun ngut kiba jah rngai” ong ka District Magistrate ka Jalpaiguri Moimita Godara haba iakren bad ki nongthoh khubor.
Ka la iathuh ba 13 ngut ki briew kiba la mynsaw malu mala, la pynkit noh sha ki hospital ba marjan.
